Martial Law na pod?

Gi-obserbar nato karon ang ika-45 ka tuig sa deklarasyon sa Martial Law (ML). Gi-deklarar ni kanhi ug anhing Diktador Ferdinand Marcos ang Balaod Militar niadtong Sept. 21, 1972. Angayan pa ba nato kining handumon? Para angayan na unta kining illubong na sa kalimot kay milabay na kini.

Apan alang sa uban lisud kining makalimtan labi pa niadtong nahimong biktima sa ML tungod sa bangis ug abuso sa militar. Nagpabilin pa ang samad ug uwat sa ilang galamhan gumikan sa mapait ug masakit nga kasinatian niadtong mangitngit nga panahon ubos sa pamumoang Marcos.

Atol sa pagdeklarar sa ML wala pa koy igong kalibutan. Apan sa pagdagan sa panahon hangtod nga kini gilibkas niadtong sayong bahin sa tuig 1980 diin aduna na akoy i-gong salabutan. Ako nakasabot na ug unsay mahimong epekto niini. Diha na ako sa kolihiyo ug gani diha na ako sa media sa dihang gilibkas ni Marcos ang ML.

Maayo baya ang ML sa sinugdanan gumikan kay ang intensiyon niini mao man ang pag-imponer ug disiplina. ‘Bagong Lipunan’. Apan nasagulan lang kini ug grabeng abuso sa militar. Gipasirad-an ni Marcos ang media ug gipangdakop kadtong taga oposisyon ug ang iyang mga kritiko. Aduna pa hinuoy pipila ka mga sakop sa media ang maisugon nga misaway kaniya apan gipangdakop.

Karon aniay hugon-hugon nga i-deklarar ni President Rodrigo Duterte ang ML kay matod pa mohimo na og agresibo ng kalihukan ang mga walhong pundok ug motisok na og kasamok. Aw, kon tinud-on kini sa mga walhong pundok ug kining mga anti-Duterte posibling moresulta sa kagubot ug adunay igong basihanan ang Presidente sa pagdeklarar ug ML.

Misuporta ako sa ML sa entiro Mindanao sa dihang mi-ataki ang teroristang Maute Group sa Marawi City. Pero lahi ang maong situwasyon. Mga armado ang maong pundok ug dili puwedeng miter-miteran ang pagpakgang kanila. Apan kon ipaubos ni Duterte ang tibuok nasud sa ML nga walay igong kapasikaran, usa ako sa mosupak niini.