Diskarte ni Duterte

Nakaagni og mga negatibong reaksyon kining pag-angkon ni Presidente Rodrigo Duterte nga bunga ra diay sa iyang imahinasyon kining iyang gipagawas nga bank account number ni Senator Antonio Trillanes IV sa Singapore. Kini human mismo nangunay si Trillanes sa pag-adto sa DBS Bank-Alexandra branch sa Singapore aron ipamatuod nga dili tinuod ang alegasyon sa presidente.

Tuod man natino ug mismo ang taga banko na ang mibutyag ug mihimakak kalabot sa bank account number nga maoy giladlad ni Duterte sa publiko nga kang Trillanes.

Tungod niini daling miluwat og pasabot si Duterte nga iya lang diay nga hinimo-himo ang giingong bank account number aron paglipat ni Trillanes.

Kini maoy salikwaot paminawon sa usa ka Presidente sa nasod. Isip pangulo sa yutang Pilipinhon, siya gilantaw ug gituohan sa kadaghanan nga kon unsay iyang ipanulti atubangan sa publiko adunay saysay sa kamatuoran. Mahimong adunay sipyat apan kini dili tinuyo o kaha naliban lang.

Apan sa gihimo karon sa presidente, iya diayng gituyo ang pagpamakak ug ingon man paghimo og peke nga alegasyon aron kunohay sa paglingla ni Trillanes.

Wa niya igbali nga sa iyang nabuhat dili lang kay si Trillanes ang iyang gilingla ug giilad kon dili ang kinatibuk-ang nasod Pilipinhon, lakip na ang 16 milyones ka botante nga mipabor kaniya sa niaging piniliay.

Kon atong sakyan nga ang paglingka ni Trillanes maoy iyang katuyoan, unsa man say iyang makuha niini? Unsa may mapaabot sa mga tawo?

Di nato ikahibulong nga sa sunod higayon nga kon adunay expose nga ipalanog ang presidente, posibling daghan na unya ang magduha-duha sa pagtuo niini kay tingali baya og bunga lang kini sa iyang imahinasyon. Di na siya daling tuohan.