I did my best
Natukmod kog kalit si Klark. Gikuptan ko siya sa kamot aron di siya mahiubos sa akong gibuhat.
“Ikaw, ha. Nagsabot baya ta.” Gikusi kog hinay ang kilid ni Klark. “Unya na nato sundi si Baby Sam kon makasal na ta. Mao ni ang atong sabot, di ba?”
Nahimuot ko sa reaksiyon ni Klark. Nakapangawot intawon siya sa iyang ulo.
“Mahimo man nga sundan nato siya?”
“Na, di pa gyud angay, Klark. Sabta sab ko.”
Naluoy ko kang Klark. Nakahibawo ko sa iyang panginahanglan apan angay lang gyud nga magpugong mi. Daghang rason nga di pa namo sundan ang among anak. Usa na ani kay wa pa mi makasal. Gawas pa, nag-eskuwela pa si Klark ug wa pa siyay trabaho. Problema lang gyud kon magpadala mi sa among gibati. “Aw, di man kaha. Di gud.” Mitalikod si Klark nako sa paghigda. Gipasagdan ko na lang siya. Pagka buntag, wa mamahaw si Klark ug wa siyay tingug-tingog nga mibiya sa balay aron sa pag-ato sa eskol. Nawala na nuon sa akong hunahuna ang pagpangutana niya kon nganong kanunay siyang magabhian sa pagpauli gikan sa tunghaan. Wa kahay
gikabuangang laing girl si Klark?
Di ko gusto nga duna koy kakompetensiya sa love ni Klark. Gusto nako nga ako ra ang iyang higugmaon forever.
“Lisod na, uy, Susette. Batan-on pa si Klark. Init pag dugo. Daghan ra bang babaye ug guwapa sa eskol.”
Niadtong adlawa, giduaw ko sa akong amiga, si Estela. Klasmet ko siya sa hayskol ug duol ra sab ang ilang balay sa among gipuy-an. Hapon na niadtong tungora. Gikan sa university nga iyang gitunghaan, midiretso siya sa pagduaw nako. Gitug-anan ko siya sa akong namatikdan nga kanunay magabhian sa pagpauli si Klark ug ingon man sa pagbalibad ko kang Klark ganinang buntag sa gusto ani.
Gikulbaan ko. Wa dayon ko makatingog.
“Paundayoni lang gud siya. Naa may daghan paagi sa pagkontrol ba. Naay daghang klaseng pills sa pagpugong sa pagmabdos.”
Miyangu-yango ko. Nakapahiyom ko sa giingon sa akong amiga. Gipabantayan kog kadyot kang Estela si Baby Sam ug miadto ko sa duol nga
pharmacy. Wa na ko magpakonsulta og doktor. Nagpalit kog pills nga giingon sa pharmacist.