Campus hold-up

Dili na matuis ang iyang hukom. Misanong na siya sa agni sa suod niyang klasmet nga si Aguido nga molangsad pagka presidente sa Supreme Student Council (SSC) sa ilang unibersidad.

“Seguro kang modaog, Jim, you are at the height of your popularity in the whole campus. This is your last year and we expect you to leave a legacy as a campus leader and editor.” Namulong si Aguido usa ka higayon niana sa ilang pagesnak sa canteen.

Tinuod ang gisulti sa iyang higala kay siya ang campus paper editor-in chief, oratorical gold medalist, champion debater ug academic scholar rolled into one sa ilang unibersidad. Way wa makaila kaniya sa tibuok campus. Apan wa dayon siya makahukom sa paglangsad kay nakakaon siyag tagam sa campus politics kay katulo na siya modagan pagka pamuno sa ilang department, circulo cervantino (biggest campus organization) ug SSC senator nga kanunayng pildi.

“Don't be coward, Jim, atong analayson nganong kanunayng modaog nga haros ang Students' Party nga gitukod ni Lito Blanco.”Mipasalig si Aguido nga maoy iyang campaign manager. Nakahunahuna man gud siya nga mo- withdraw na lang kay ang iyang kaatbang mao man gyud si Lito kinsa anak og asiyendero sa Negros ug popular nga medical student.

Sa eleksiyon sa campus kanunayng haros ang Students' Party ug way mobarog nga laing party. Ang gitukod ni Jim nga Young Advocates Party kanunayng takungo kay way dagan bisan usa na lang ka position.

“Ayaw kaguol kon mapildi ka, Jim, daog ka bitaw nako kon mohangyo ka.” Gidasig siya sa iyang trato nga si Nimfa nga bigot kaayog sampot ug puti kaayog batiis nga darling girl sad sa campus.

Kapoy kaayo ang room to room campaign, apan kalit misayaw ang iyang dughan sa gipahibawo ni Aguido kaniya nga plano aron seguro ang kadaugan. Silang duha ang motuman sa plano aron way sipyat ug maangkon ang kalampusan.

Tungang gabii sa bisperas sa campus election sa unibersidad. Gibukotan sa kahilom ang tibuok campus. Ganiha gilili siya sa sikyu sa publication office ug mikilo kini. Sa akong kilid si Aguido nga nagbasag magasin. Anad na ang sikyu kay kanunay kong mag- overtime sa pag- edit sa mga manuscript nga usahay maabtag kaadlawon. Mikilo nako si Aguido ug gitan-aw ko ang orasan sa bungbong, ala una na sa kaadlawon. Giablihan nako ang pultahan. Giandam ni Aguido ang panyo nga iyang gibasa sa pangtulog nga likido nga iyang gida. Gibantayan nila ang tawo nga moagi nga maoy ilang tumong ug gisabutan.

“Anhi gyud na siya mag-agian kon motrabaho na, wa ko mosipyat, Guds. “Pasalig ni Jim.

Taudtaod may miaringkil ug nakita nila nga nagdung ang usa ka tawo nga nagdiyaket nga may gipas-an nga sako. Gisenywasan ni Jim si Aguido sa pagpangandam kay kini na si Braulio, ang broom supervisor sa mga working student diin naa kaniya ang tanang duplicate nga yawe sa mga kuwarto sa unibersidad. Nahibawo na sila kon unsay ilang himuon.

Gitaod nila ang ilang maskara aron di makaila ang tawo. Sa pag-agi niini kalit nga gibunlot ni Jim. “Hooy!” nakasinggit ang tawo apan gidasmagan ni Aguido nga mipaod dayon sa basang panyo sa nawong niini. Nasawo ni Jim ug giagak padung sa luyo. nawong niini. Miagunto nga mihingos ang ilong ug nasarasay. Gipahigda nila nga naghagok ug ilang gitabunan sa mga tabon sa typewriter. Gihiling nila ang sako. Misiga ang ilang mga mata kay mga balota nga may suwat na daan sa mga kandidato sa Students' Party. “Jim, daan pa lagi ko!” tuaw ni Aguido.

Makabungog ang mayoriya ni Jim sa piniliay. Puwerteng lipaya ni Aguido ug naglukso-lukso. Human sa imbestigasyon namatud-an nga si Braulio mao ang nanikas pinaagi sa ballot switching sa matag campus election kay bayran man ni Lito sa dakong kantidad. Gi- fire out si Braulio sa unibersidad ug si Lito gi- expel sa College of Medicine.

Sa mabugnawng lawak sa motel nasud-ong na sad ni Jim ang hubong kaanyag ni Nimfa. Naghikab-hikab siya nga nagtutok sa dalaga. “Jim, daan pa ko, madoble ang imong kadaugan!” Wa motingog ang newly elected SSC president tungod sa nag-awas-awas nga kahinam sa pag-angkon sa dalaga.