Pinoy Pride 42: sulit entertainment
Sulit ug wa gyud magmahay ang mga nitansa Pinoy Pride 42: Clash for Glory boxing niadtong Sabado sa Waterfront Hotel-Lahug.
Gawas lang sa pipila ka mga preliminary fights nga wa mag-tiwas sa round, sa gipaabot sa kadaghanan nakahatag og saktong entertainment ang mga away tali nila ni kanhi world champion Johnriel Casimero ug sa bag-ong sulpot nga si Jonas Sultan; Jason Pagara ug sa Kenyan nga si James Oyanggo ug labaw sa tanan ang gikahinaman nga sinukliay sa kumo tali ni IBF jr.
flyweight king Milan “El Metodico” Melindo ug sa South African challenger nga si Hekkie “The Hexecutioner” Budler.
Pero dunay mga diskontento sa desisyon sa mga judges sa away ni Pagara ug Oyanggo nga miresulta sa panagtabla (split draw).
Kulatado man gud si Pagara sa uwahing mga rounds mao nga daghan ang nagtuo nga pildihunon siya sa away, pero in fairness sa mga judges, kaduha matumba - sa second ug fifth round - si Oyanggo hinungdan nga nakapundo usab og mga puntos si Pagara. Alang nako, sakto-sakto lang sab gyud to nga desisyon.
Pero dunay gamayng sipyat sa sumada. Napulo ka round ra ang away apan sa unsa bang pagka-unsa nga ang scores miabot man og sobra sa napulo ka round.
Sa ilang scoredcards nga gianunsyo, si judge Edward Ligas mitali og 114-114; judge Edgar Olalo, 114-113; ug judge Arnie Nareja, 115-113.
Apan si Rolando Mendoza sa Games and Amusement Board (GAB) dali mipasabot ug mihatag nato og katinang tinud-anay diay nga score mao ning mosunod: Ligas, 94-94; Olalo, 93-94 Oyango: Najera, 95-93, Pagara.
Sa ato pa, nasubrag tag 20 puntos ang tagsatagsa ka scores sa mga judges apan wa kini makaapekto sa resulta sa away. Hinuon, giangkon ni Mendoza ang kasaypanan.
Samtang lingaw sab kaayo ang away ni Sultan ug Casimero. Nagtuo siguro si Casimero nga dili ingon ato ka idlas ug kalantip si Sultan nga moaway mao nga daw wa niya mapreparahi ang estelo niini.
Ang nahitabo nga nagbinagsa na lang siya sa iyang sukmag uban sa pangindahay nga makaigog one-punch nga makatumba ni Sultan. Pero wa gyud ni moabot.
Sa Round 6 nga maoy iyang gisaad nga round naantimano si Sultan pero way follow up si Casimero hinungdan nga naka recover ra gihapon kini.
Pero labaw sa tanan, way puas nga aksyon ang gisaksihan sa nagpuot nga mga tawo sulod sa Ballroom sa away ni Melindo ug Budler.
Didto napakita ni Melindo ang iyang kalantip ug kaisog kay bisan pa man og nagkadugo tungod sa gisi agi sa headbutt, nakig- bell-to-bell pa kini sa agresibo kaayo nga si Budler aron angkunon ang split decision nga kadaugan.
Ingon ani nga away maoy atong gikinahanglan nga maoy makapabuhi sa boxing. Kodus to Ala Boxing Promotion.