SWU VS. USJ-R
Suwayan sa University of San Jose Recoletos (USJR) Jaguars nga mapahugtan og samot ang ilang paggunit sa ikaduhang luna sa ilang pagpakigbatok og balik sa Southwestern University (SWU) Cobras sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Jaguars ni coach Jun Noel adunay 6-2 nga rekord sunod sa league-leader ug defending champions University of the Visayas (UV) Green Lancers nga adunay 8-1 nga rekord. Ang Jaguars aduna pa’y upat ka mga duwa nga nahabilin sa double-round elimination sugod ning kombatiha.
Aron makaseguro sila og luna sa top two nga dili moagi og komplikasyon, ang Jaguars nagkinahanglan pa nga makadugang og duha ka mga daog. Importante ang pagsulod sa top two gumikan kay nagtangag
kini og twice-to-beat nga bintaha sa nagkaduol nga semi-finals. Sa ilang bahin, ang Cobras ni
coach Mike Reyes naa sa ikalimang luna dala ang 3-5 nga rekord.
Kuli man tuod apan aduna pa’y poruhan ang Cobras nga makailog og puwesto sa top
two kon maharos nila pagdaog ang nahabilin nilang upat ka mga duwa, depende hinuon sa resulta sa nahabiling mga duwa sa ubang teams.
Ang Jaguars ug Cobras pulos tag-as og moral ning sangkaa kay pareho silang gikan sa duha ka sunodsunod nga kadaugan. Gipangbuntog sa Jaguars ang usa sa mga gikahadlukan nga University of San Carlos (USC) Warriors, 74-69, niadtong Septiyembre 17 unya gisunod nila pagbiktima ang Cebu Institute of Technology University (CITU) Wildcats, 90-75, niadto lang Martes.
Samtang ang Cobras ningmakmak sa University of Cebu (UC) Webmasters, 71-62, niadtong Septiyembre 5 unya gisundan kini nila og 72-67 nga kadaugan batok sa Wildcats niadtong Septiyembre 17.
Pareha man tuod sila nga adunay tag-as nga moral apan dili ikalimod nga nakabintaha ang puwersa sa Jaguars batok sa Cobras.
Sa premiro nilang panagsangka niadtong Agusto 12, gipanglampornas sa Jaguars ang Cobras, 103-88.
Ang mga pambato sa Jaguars mao sila si RJ Dinolan, Jaybie Mantila, Victor Nuñez, Albert Catiloc, Julius Pacanuayan ug Ricky Peromingan.
Samtang ang Cobras magsalig og maayo nila ni Edmundo Bayhunan, Shaquille Imperial, Jovanie Luz, Mark Racho, Reeve Ugsang ug Gerald Fernandez.
Sa high school division, magsangka sa premirong duwa ang SWU Baby Cobras ug Don Bosco Technological Center (DBTC) Greywolves.
Wala na’y bili kining maong kombati gumikan kay parehong wala na’y poruhan nga makaabante sa semi-finals ang Baby Cobras ug Greywolves nga pulos mosagubang sa katapusan nilang tahas sa elimination round.
Ang Baby Cobras adunay 3-5 nga rekord samtang ang Greywolves naghupot og 2-6 nga baraha.