DEEJAY GITULIS, GIPATAY
SUSPEK SAMDAN KAY GISUKLAN; NASIKOP SA OSPITAL
■ GITULIS: Mao kini ang FM disc jockey ug call center agent nga si Marie Maxie Bolongaita, 29, kinsa gitulis ug gipatay sulod sa iyang lawak sa Brgy. Busay, dakbayan sa Sugbo. May samad pinusilan si Bolongaita. Gituohan nga siya nisukol sa suspek nga giilang si Rene Mambiar, kinsa nadakpan sud sa ospital kay nagpaadmit kay samdan. Estorya sa pahina 2. Si Bolongaita giila nga Miss KBP 2016 ug runner-up sa Miss Cebu Press Freedom 2016.
Namatay ang anak sa usa ka magsisibya sa radyo sa siyudad sa Sugbo human gituohang gitulis ug gipusil sud sa ikatulong andana sa ilang apartment sa sitio Nivel Hills, barangay Busay, kagahapon sa kaadlawon.
Gituohan nga gisuklan sa biktima ang suspek nga giilang si Renante Mambiar, 36,kay samdan kining nadakpan sa kapulisan sud sa usa ka pampublikong tambalanan sa dakbayan sa Sugbo.
Si Marie Alexi “Maxi” Ortiz Bolongaita, kinsa nahimong
part time disc jockey sa usa ka FM station sa syudad sa Sugbo ug kasamtangang call center
agent, patay nang nakaplagan sud sa iyang lawak.
Pasado alas dos kagahapon sa kaadlawon giingong naabot si Marie Alexi sa ilang pinuyanan gikan sa trabaho sa IT Park sakay sa suki niyang habal-habal driver.
KAGUBOT
Apan giingong pasado alas 3 sa kaadlawon, ang mga silingan ni Bolongaita, lakip na ang
caretaker, nakamatikod nga dunay kagubot sa lawak niini. Human madungog sa
caretaker sa apartment ang kasikas, nigawas ang usa ka lalake nga nagkadugo. Dali nga nireport ang caretaker sa barangay labot sa nahitabo sa unit ni Bolongaita ug sa dihang gisusi sa mga barangay tanod uban ni kanhi Busay barangay kapitan Yody Sanchez, duna silay nakita nga pat-ak sa dugo sa gawas nga gituohan nga gikan sa kwarto ni Bolongaita.
Matod ni Sanchez nga iyang gipasaka sa ikaduhang andana sa caretaker ug sa dihang gilili na ang bintana, nakit-an ang lawas ni Bolongaita nga nagbuy-od duol sa pultahan sa iyang lawak.
NIBAHAR
“Ang caretaker nagkuha og tubig sa likod kay tupad ra man na ilang apartment. Mao say paglayat atong suspek. Paglayat sa suspek giingnan siya ayaw og sunod. Sundon gani ko nimo, pusilon tika,” matod ni Sanchez.
Tungod sa kahadlok, wa na sundi sa caretaker si Mambiar.
Gibana-bana 20 minutos naagi usab dayon ang mga barangay tanod nga nag roving niadtong mga orasa apan wa niya paraha tungod sa kahadlok.
Gituohan nga didto miagi sa luyo sa apartment si Mambiar ug nisaka ug giguba ang sliding window sa ikatulong andana nga maoy hinungdan nga malampuson nga nakasulod.
Duha ka mga samad pinusilan sa tuong dughan ang naangkon ni Bolongaita.
Nakuha sa crime scene ang usa ka kalibre .22 nga revolver nga dunay lima ka basiyo ug tulo ka buhing bala ug usa ka sundang nga nagkadugo na.
AMAHAN
Pasado alas 6 sa buntag napahibawo ang amahan sa biktima nga si Alex Bolongaita ug dali ning misusi sa balay sa iyang anak.
Nagtuo si Alex nga gitulis ang iyang anak ug andam usab niyang ipaubos sa autopsy ang lawas niini aron matino kon wa ba ni gilugos.
“Dili man ta expert aning hitaboa. Ako na lang ni ipasusi ug ang police na ang mo determine kon giunsa ang akung anak,” matod ni Alex.
NASUBAY
Samtang pipila ka oras ang milabay sa dihang blangko pa ang kapululisan kinsa ang naghimo sa krimen nakadawat og kasayuran ang Homicide section nga dunay samdan nga nalandig sa usa ka pribadong tambalanan sa syudad sa Sugbo apan gibalhin sa Vicente Sotto Memorial Medical Center.
Giingong ang maong lalake dunay daghang patik sa lawas ug dunay dakong samad sa tuong abaga ug dunay pinusilan sa tuong nawong.
Nagpatuo si Mambiar nga napusilan siya sa barangay Tisa apan sa dihang gisubay sa Homicide section, wa silay nadawat nga alarma sa pagpamusil.
Dali nilang gisusi ang ospital ug dinhi ilang nahibaw-an nga siya ang nagtulis ug nagpusil patay ni Bolongaita. Positibo usab nga giila sa
caretaker si Mambiar nga maoy iyang gikasugat kagahapon sa kaadlawon. / AYB, JFT