AKSIDENTE SA MANDAUE MIMUGNA OG TRAPIKO

Hapit molungtad sa tulo ka oras ang kahuot sa trapiko sa pipila ka mga dalan sa dakbayan sa Mandaue nunot sa duha ka aksidente sa may dalan DM Cortes ug AS Fortuna kagahapon sa buntag hangtod udto.

Mga 70 ka case sa softdrinks nga sakay sa usa ka 10- wheeler

truck ang nangabuak sa may DM Cortes mga alas 9:30 sa buntag human naputol ang pisi nga gihigot sa mga case sa softdrinks. Matod ni Glenn Antigua,

operations chief sa Traffic Enforcement Agency of Mandaue (TEAM) nga nilungtad ug mga duha ka oras una nila hingpit malimpyo ang karsada nga napuno sa bildo.

Kini maoy hinungdan nga nabara ang dagan sa trapiko nga nikonektar sa mga dalan sa UN Avenue ug MC Briones.

“Connected man gud ang mga dalan maong mo- build up dayon ang traffic,” ni Antigua ning mantalaan.

Dugang niya nga nitabang pa ang buhatan sa City Engineering aron nga malimpyo ang mga bildo nga nalagpot sa pikas lane.

Nasuta sa Superbalita Cebu nga paingon sa norte ang maong truck atol sa insidente.

Wa pa maabti og duha ka oras, usa ka pick up truck sab ang nidaro ug upat ka mga tawo kilid sa sidewalk.

Sa upat ka mga nangaangol, si Antigua niingong duha niini ang nawad-an sa panimuot. Ang mga nangaangol, tulo ka lalake ug usa ka babaye gidala na hinuon sa Vicente Sotto Memorial Medical Center sa dakbayan sa Sugbo.

Atol sa aksidente mga alas 11 sa buntag, nipasangil ang drayber sa pick- up nga nawadan siya og break sa aksidente.

Apan di kombinsido niini si Antigua sa rason sa drayber tungod kay sa pakisusi niini, tarong ang break niini. /