CORON GIBALIKBALIKAN SA MGA TURISTA
Unsaon pagpili ug tours sa Coron?
Daghang mga rason nganong balik-balikan sa mga turista ang Coron, Palawan. Kini tungod kay di mahutdan sa maanindot nga talan-awon sa dapit, mapababaw man o ilawom sa dagat. Gawas niini, ang Coron nga nahisakop sa Palawan maoy nagpabiling numero uno nga isla sa tibuok kalibutan ning tuiga base sa survey sa nabantog nga Travel and Leisure magazine.
Ubay-ubay ang mga kalihokan nga imong mahimo sa Coron ug tungod sa kadaghang tours nga gitanyag sa mga travel agency, usahay maglibog ka og pili.
Ania ang pipila sa mga tip ning mantalaan sa pagkuha og tour sa Coron.
1. Presyo. Sagad presyo sa tour sa Coron maggikan sa P500 ngadto sa P2,500 matag tawo, depende sa mga gilay-on ug pipila ka lugar nga inyong bisitahon. Ang labing barato mao ang town tour nga mokabat sa P500-P700/person sa tibuok adlaw nga tour.
2.
Oras. Sagad sa mga tour magsugod sa alas 8:00 sa buntag ngadto sa alas 5:00 sa hapon. Adunay uban nga alas 4:00 pa lang sa buntag, magsugod namo og biyahe ilabi na kon layo inyong adtuan sama sa Calauit Safari Tour.
3.
Pagkaon. Lakip na ang pagkaon ug snacks sa mga tour nga inyong kuhaon sa Coron maong di namu kinahanglan pa magbawon pa og pagkaon. Apan kinahanglan magbantay mo sa inyong gipangkaon aron malikayan ang kaso sa food poisoning tungod kay giluto o giandam naman daan ang mga pagkaon ug di nimo makit-an ang kalimpyo sa preparasyon niini.
4. Kon naglibog gihapon ka, pangutana sa imong hotel/hostel/ lodge kon nagtanyag ba sila og tour. Mas maayo nga kon asa mo nag-stay sa Coron, didto kamo mangutana kon nagtanyag ba kini og tour. Mas dali kaysa mangita pa kamo og travel agency. Gamay ra ang gintang sa presyo.
Rekomendasyon:
1. Kon kahibawo ka mag-motor, mas maayo nga mag-abang ka og motor sa paglibot nimu sa tibuok
lungsod. Ang abang sa motor anaa sa P500- P600 matag adlaw. Mas maayo nga mag-motor ka uban sa imong mga higala tungod kay wa may makabuot sa oras ninyo ug daghan usab kamo maadto nga lugar.
2. Kon mahilig ka og snorkeling ug free diving, angay alang nimo ang “Reef and Wrecks” tour. Inyong mabisita ang Pass Island, Lusong Shipwreck ug Lusong Coral Garden.
3. Kon gusto ka og daghang maadtuan, ang Coron Island Ultimate Tour ang alang nimo. Imo nang mabisita ang ang sikat nga Kayangan Lake ug Twin Lagoon, Siete Pecados, Beach 91, Skeleton Wreck, Malwawey Reef ug Cyc Beach. Ang presyo sa ultimate tour gikan sa P1,300 ngadto sa P1,600 matag ulo. /