Misamot ang hulga

Kagahapon gisaulog sa nasod ang ika 45 nga kasumaran sa martial law nga gideklarar ni anhing presidente Marcos niadtong Septiyembre 21, 1972. Giisip ang martial law nga maoy labing pait nga yugto sa kasaysayan sa nasod tungod sa grabeng pangabuso sa tawhanong katungod sa militar ug kapulisan niadtong panahuna.

Daghang mga mantalaan ug sibyaanan nga nasirhan tungod sa balaud militar. Tuod, gilibkas niadtong Enero 17, 1981 ang martial law.

Nabuhi man tuod ang kagawasan sa pagpanibya ug pagmantala, apan grabe ang hulga ngadto sa mga journalist. Ang Pilipinas maoy ikaupat nga labing kuyaw nga nasod sa kalibutan alang sa mga tigbalita. Labing minos 130 na ka mga journalist ang gipatay dinhi sa nasod human sa martial law.

Ning pagsulbong karon sa social media, nitumaw na usab ang laing hulga sa prensa, ang fake news.

Ang nakapait, gigamit sa mga pulitiko, apil na sa naa sa gobyerno, ang fake news alang sa propaganda, labina kon dunay negatibong mga epekto sa ilang political career ug buhatan ang tinuod nga balita.

Di lang kay gihulga ang kinabuhi sa mga journalist, ang tinuod nga balita mismo patyon sa fake kun ginama-gama nga balita nga gipalutaw nga tinuod ug gipasaw-an sa social media sa publiko, labina kon kini nahasubay sa ilang pulitikong gidapigan.

Ang bakak nga balita nga gibalikbalik pagpasawo bisan niadtong nakahibawo nga kini peke, nakahulma og dagway nga kini tinuod.

Bitaw, 45 ka tuig na ang nakalabay sukad gideklarar ang martial law, apan ang dakong hulga nagpabilin.

Di lang kay ang pagpatay sa journalist maoy hulga, karon giapil na ang tinuod nga balita.