Marian Rivera: ‘walang kinatakutan at palaban’
Nahibalo na gyud mo nga may bag-ong teleserye ni Marian Rivera sa GMA 7, ang Super Ma’am diin usa siya ka buotan ug matinud-anong magtutudlo nga si Minerva Henerala nga nakaangkon og
super power aron makigsangka sa mga Tamawo.
Usa ka hingatawa ug komedyanteng Marian ang nakighimamat sa taga E-Group niadtong Sabado. Nakatabang nga komedyante ang usa sa iyang mga leading men, si Jerald Napoles.
Gihulagway ni Jerald nga paghatag og ‘texture’ sa kalibutan nga daghang gwapo ang pagkaapil niya sa teleserye. Ang Fil-Am leading man nga si Matthias Rhoads niisip nga ‘big
stroke of luck, perfect timing’ ug ‘amazing journey’ ang kasinatian. Gihulagway ni Marian ang kaugalingon nga ‘walang kinatakutan at palaban’ sa mga esena nga makig-away siya sa mga kontra.
Ang ubang artista nga apil sa teleserye mao sila si Ms. Helen Gamboa, Ms. Dina Bonnevie, Al Tantay, Julius Miguel, Kim Domingo, Ms. Jackielou Blanco, Ms. Carmina Villaroel, Ms. Ai-ai delas Alas, ug uban pa.
Sa unang higayon, nahimamat nako ang inila ug award-winning nga direktor nga si Maryo J. delos Reyes adtong Martes. Kauban niya ang iyang mga talents nga sila si Orlando Sol ug Blumark Roces ug ang kanhi Pinoy Big Brother housemate nga si Catherine Rem.
Gikan sa grupong Maskulados, nag-solo si Orlando ug may bag-ong album nga gitawag og Emosyon diin sulod niini ang Ingatan Mo Ang Salitang Mahal Kita, Kaibigan, Kailan Darating Ang Ayoko Na?, I’ll Always Be There ug Lilipad Ako ‘Nay.
Gikan sa kantang Kailan Darating Ang Ayoko Na? nahimugso ang labing unang video serye nga parehas og ulohan nga gibidahan nila ni Orlando, Blumark ug Catherine. Pulos mosultig Binisaya ang tulo kay taga Butuan si Orlando ug taga Bohol sila si Blumark ug Cathy.
LGBT ang tema niini ug may mga esenang seksi sila si Orlando ug Cathy ingon man si Orlando ug Blumark. Lima kini ka
episodes ug makita sa YouTube channel.
Nindot ang mga plano ni Direk Maryo alang nila ni Orlando ug Blumark nga karon lang nibalik sa syobis human sa 12 ka tuig. ‘Matapang’ ang paghulagway ni direk sa proyekto nga iyang giandam.