I did my best
Nagabhian na sab sa pagpauli si klark. Apan wa ko siya awaya ug pangutankon nganong nalangay na sab siya. Gisukaran nuon nako siya. Morag way kadasig si Klark nga mikaon. Guol ang iyang nawong. Ug samtang nagkaon siya, naligo ko. Natulog na si Baby Sam.
Pagkahuman kog kaligo, gitan-aw kog dugay ni Klark. Nagtapis lang kog tualya. Nagpahiyom na si Klark. Gihiwian ko siya apan nagpahiyom ko. Miuna kog higda sa among kuwarto. Unya nadungog ko ang binusagak sa shower sa banyo. Naligo si Klark. Gipawong ko ang suga.
Wa madugay nabatyagan ko ang paghigda ni Klark tupad nako. Nasingo ko ang iyang kahumot. Iya dayon kong gigakos. Gihagkan ko niya sa lips. Nakapiyong ko kay lihokan kaayo ang kamot ni Klark. Bisag diin na lang kini napunta sa mga sensitibong bahin sa akong lawas. Di ko kapugngan ang paglit-ad. Bisag giunsa kog pugong, nakaagulo gyod ko.
Unya nahilom mi. Pgkataudtaod, mora mig nagtungas og taas nga bungtod. Mihangos mi pag-ayo. Gipaningot ko ug wa na maglihok human sa taas-taas nga hugna sa kalipay. Mitakilid ko paatubang kang Klark. Gikusi ko siya sa kilid. Nakatig-ik siya ug nahikatawa.
“Ikaw, ha. Di gyud pabalibad. Mangita gani kag laing
girl, mopauli gyud ko sa amo ug di na ko nimo.”
“Ikaw ra ang akong love, uy, Susette.” “Basta ha.” “O lagi.” Wa na ko makatubag kay gihagkan na sab ko ni Klark sa akong lips. Ning higayona, misamot ka agrisibo si Klark. Init pa gyud kaayo siyag dugo kay batan-on pa man. Ug di kay siya ra ang nahimong agrisibo, hangtod na sab ko. Wa na man sab koy gikahadlokan nga momabdos kay nagtumar man kog pills.
Nagtuo ko nga magdayon na ang akong kalipay uban kang Klark. Apan nasayop diay ko kay mibalik na sab ang iyang kinaiya nga tagdugay mopauli gikan sa eskol. Migrabe pa gani kay usahay mabuntagan siya. Kanunay na ming magaway.
“Di na ko kaagwanta aning imong gibuhat nako, uy, Klark. Taken for granted na man lang ko nimo?” “Aw, naa ra nimo!” Nasuko si Klark. Naghilom na lang ko. Ug sa misunod nga mga adlaw, nadeskubrehan ko nga duna diay siyay laing girlfriend.