BOLTS MAKIGSAWO SA GINEBRA KINGS

Mga duwa karon: 4:15 pm. Star

batok Picanto 7:00 pm. GlobalPort

batok Bolts

Ang pagpakigsawo sa liderato uban sa Barangay Ginebra maoy target karon sa Meralco Bolts sa ilang pagpakigharon sa nataktak na nga GlobalPort Batang Pier sa nagpadayon nga PBA Governor's Cup sa Mall of Asia Arena.

Kini aron pagsiguro ug pagpahugot nga dili na sila mawagtang sa top 4 human sa elimination round diin maangkon nila ang twice-to-beat nga bintaha sa quarterfinals.

Apan bisan pa man tuod og wala nay paglaom sa sunod round, ang Batang Pier nagtinguha kini nga magbilin og maayong record sa dili pa motak-op ang ilang mga duwa sa elimination phase.

Tungod niini, si Boltz coach Norman Black mipahimangno sa iyang mga ginsakupan sa pagsalikway sa kompiyansa.

Ang Ginebra naghupot og 8-2 nga baraha alang sa unang dapit ug hugot nga nagsunod niini ang Bolts nga may 7-2.

Sikit usab nga nagsunod ang San Miguel ug TNT Katropa nga pulos nagtangag og 7-3 nga baraha nga gisundan usab sa Rain or Shine (6-4).

Ang Star Hotshots nahimutang sa ikapitong puwesto may 5-4 nga baraha apan migimaw gihapon ang iyang purohan nga makasulod sa top 4 ug makaangkon sa twice-to-beat nga advantage.

Karong alas 4:15 sa hapon sugdan sa Star Hotshots pagkablit ang ilang paglaom pinaagi sa pagpakigbatok sa way daog ug nataktak na nga Kia Picanto.

Anaa man tuod nila ang bintaha apan wa kini magpasabot nga yano ra nilang mapukan ang Picanto. Kini tungod kay alang kang coach Chito Victolero, wala na kini pressure.

“We need to win our remaining games, then iyung ibang teams matalo,” matod ni coach Chito Victolero nga nakutloan sa PBA.ph.

“Kia is a dangerous team because there is no more pressure to play. They almost beat SMB so we just need to go hard, prepare hard, respect the game and respect our opponents in order for us to win this game.”