Tepora molabni sa WBO title

Malisod man tuod apan nagpasuabi ang pagsalig sa wala pay pildi nga si Jack Tepora nga iyang malangkat ang nabakanting World Boxing Organization (WBO) Inter-continental featherweight title didto sa Orient Theater sa East London, South Africa.

Ang away gikatakda nga ipahigayon sa Biyernes didto sa South Africa, apan tungang gabii karong adlawa dinhi sa Pilipinas.

Bitbig ang 20-0, 15 ka knockouts, ang 24 anyos nga Tepora makigsinukliay sa kumo batok sa hardhitting nga si Lusanda Komanisi (21-3, 18 KOs) nga maoy magsilbi niyang agianan alang sa world title fight.

Kini maoy una niyang away gawas sa nasod sukad sa iyang pagka professional fighter nga nagsugod niadtong 2012.

Katapusang nakaaway si Tepora niadtong Mayo 18 ning tuiga diin iyang gi-knockout ang Indonesian nga si Yon Armed sulod lang sa usa ka round sa Waterfront Hotel and Casino.

Gikatakda unta nga moanga way ang walhon nga Tepora niadtong Hulyo 7 didto sa Bohol batok sa Mexicanong si Emmanuel Dominguez apan nakanselar ang maong promotion sa dihang na-injured ang iyang stablemate nga si Christian Araneta kinsa gikatakda unta nga maoy co-main eventer sa maong card.

Isip preparasyon sa maong away, si Tepora uban sa iyang trainer nga si Jinggoy Junco ug sa iyang igsuon nga si Jellyper “Jing-jing” Tepora didto mipahigayon sa iyang subsob nga training sa Baguio City.

Si Roli Gasca, ang laing Cebu-based fighter kinsa nakaaway ni Komanisi og duha ka higayon, mipadayag og pahimangno ni Tepora butang nga gisinsin sa alimpatakan sa nauwahi.

Sa una nilang away, si Gasca napildi pinaagi sa split decision. Sa ilang rematch na-knockout si Gasca sa ikalimang round. Matod ni Gasca nga dili siya makapaniguro sa chance ni Tepora kay aduna usay igong kusog si Komanisi.

Hinuon gitambagan si Tepora ni Gasca nga dili lang gyud kini magpundo ug dili usab palabyon kon dunay higayon nga maka-knockout kini aron malikayan ang hometown decision.