P247 M kita sa Kapitolyo sa unang tunga sa 2017

Mitubo og P247 milyones ang kita sa kagamhanan sa lalawigan sa Sugbo sa unang unom ka mga buwan karong tuiga.

Sa comparative income ug expenses nga gipakita ni Provincial Accountant Ramon Dumayac, ang total gross income sa Kapitolyo kay niabot og P1,797,933,938.26 gikan sa Enero hangtod sa Hunyo sa 2017, mas dako kon itandi sa P1,550,888,391 sa samang panahon sa miaging tuig.

Siya niingon nga maayo ang dagan sa panudlanan sa lalawigan tungod kay epektibo ang paagi sa pagkolekta og buhis sa Provincial Treasurer's Office ug maayo ang pagdumala sa administrasyon ni Gobernador Hilario Davide III sa 16 ka mga provincial ug district hospitals.

Ang P1.7 bilyones nga gross income kuhaan pa sa P785,919,034.27 nga total operating expenses sa unang unom ka buwan karong tuiga. Sa 2016, mikabat og P920,021,972.26 ang nagasto.

Apil sa total operating expenses ang sweldo sa mga empleyado sa lalawigan (P299 milyones), maintenance ug ubang operating expenses (P430 milyones) ug non cash expenses (P56.6 milyones).

Si Provincial Accountant Ramon Dumayac Jr. niingon nga moabot og P1,012,014,903.99 ang net income sa Kapitolyo nga mas dako kon itandi sa P630,866,418.74 samang panahon sa nakalabay nga tuig.

Sa P1.7 bilyones, matod niya, labing dako nagagikan sa external sources nga P1,455,547,656 nga bahin sa lalawigan sa Internal Revenue Allotment sa nasudnong kagamhanan, P682 mil nga bahin sa national wealth ug P1.8 milyones sa Pagcor o Philippine Charity Sweepstakes Office.

Mitubo og P193,449,048 ang bahin sa Kapitolyo sa IRA karong 2017 kon itandi sa P1.2 bilyones

Si Dumayac namahayag nga maayo ang performance sa panudlanan sa Kapitolyo tungod kay maayo ug epektibo ang pagpangolekta og buhis sa buhatan sa Provincial Treasurer.

Matod niya dako usab ang income sa lalawigan nagagikan sa internal sources o gitawag og tax revenues nga kinatibuk-ang miabot og P115,321,010.87, gikan sa Enero hangtod sa Hunyo karong tuiga.

Apil niini ang local taxes nga naglangkob sa amusement tax (P1.021 milyones), franchise tax (P17.8 milyones), occupation tax (P907.7 mil), property transfer tax (P15.2 milyones), real property tax (P52.8 milyones), tax on delivery, trucks ug vans (P4.4 milyones), tax on sand, gravel ug quarry products (P11.3 milyones), ug multa ug penalties (P11.6 milyones).

Dako usab og kita ang Kapitolyo sa medical, dental ug laboratory fees nga niabot og P76,803,768.99 karong 2017, midako kon itandi sa P71,158,924.41 sa samang panahon sa miaging tuig.

Dako usab ang kit sa provincial government sa mga tambalanan nga gidumala sa provincial government nga nikabat og P63,900,540.61 samtang, P41.165 milyones sa 2016.