LALAKI NALIGSAN-PATAY

Dead-on-arrival (DOA) ang usa ka motorista human naligsan sa usa ka prime mover nga sakyanan didto sa may dalan A.C.Cortes, Brgy. Opao, dakbayan sa Mandaue niadtong Biyernes sa hapon.

Kini na maoy ang ikatulong aksidente sa dakbayan ning semanaha nga nikalas og kinabuhi.

Ang biktima giila nga si Alfredo Navarro, 48, taga Sitio Kalubihan, Brgy. Pardo, dakbayan sa Sugbo.

Matod ni Glenn Antigua, pangulo sa Traffic Enforcement Agency of Mandaue (TEAM) nga ang biktima luwan sa Kawasaki Fury motorcycle ( GA 87126) sa dihang naligsan sa Fuso prime mover truck nga may plakang 120110 nga gimaneho ni Pedro Camingue sa Sitio Pokang, Brgy. Looc, dakbayan sa Mandaue.

Matod ni Antigua nga paingon sulod sa MC Briones ang biktima ug ang suspek sa dihang nahitabo ang insidente pasado alas 2 sa hapon.

Giingong wa mabantayi ni Camingue si Navarro nga nihunong ug nagpandong sa iyang raincoat nunot sa pagbunok sa uwan.

Gidali pa pagtabang sa mga otoridad ang biktima apan gideklarar na kini nga DOA sa Mandaue City Hospital.

Kasamtangang gibalhug karon ang suspek ug kini gikatakdang pasakaan og kasong reckless imprudence resulting to homicide and damage to property.

Niadtong Miyerkules, patay ang usa ka bana human kaduha malatayi sa truck samtang nabali usab ang bukton sa asawa niini sa aksidente didto sa may Ouano Ave., eskina Mantawi Drive, Subangdaku, sa dakbayan.

Niadtong Huwebes, upat ka mga tawo ang gidaro sa usa ka pick up truck sa AS Fortuna ug usa sa mga biktima, namatay sa tambalanan.