‘Old script’

Sus, og wala pa kitay balaod nga gisunod, kaayo baya ihawon o tiwasan kining nagpatay sa 29 anyos nga radio disc jockey ug call center agent nga si Maxi Bolongaita. Si Maxi, part time disc jockey sa Power FM, anak sa beteranong brodkaster ug akong higala nga si Alex Bolongaita. Gisulod ang panimalay ni Maxi nga nahimutang sa barangay Busay ug gitulis siya. Dili pa igo, gipatay pa gyud siya.

Hinoon nakabawos ang dalaga ug iyang natigbasan ang suspek nga si Reynante Mendador Mambiar, 36, taga Salinas Drive, Lahug. Si Mambiar bag-o lang nakagawas sa bilangguan gumikan sa kasong illegal nga drugas. Matod pa sa mga opisyal sa Barangay Busay, ang suspek na-ila usab nga akyat bahay. Nadakpan siya sulod sa Vicente Sotto Memorial Medical Center (VSMMC) diin siya nagpatambal gumikan sa samad kay nakabawos si Maxi sa pagtigbas kaniya gamit ang jungle bolo.

Mo-angkon ko nga kon makadungog ako og mga balita sama niini moulbo dayon akong kasuko ug mosaka akong blood pressure. Ug dili nako kalikayan nga mahimo kong emotional labi pa kay ang biktima anak sa akong higala ug kauban sa buhat.

Gumikan niini dili usab nako kalikayan nga mosangpot sa akong huna-huna nga maayo pay ipapatay usab kining suspek. Niluog ang iyang gibuhat nga mahimo kang sa usa ka mabangis nga hayop. Mas maayo usab siyang mamatay sa niloog usab nga paagi.

Sa dihang akong gihisgutan kining kaso ni Maxi sa akong tulumanon sa DYSS Super Radyo, daghan ang misugyot nga maayo tiwasan nalang kining suspek. Maayo gyud tinuod apan unsa-on nga aduna man kitay balaod nga gisunod sa pagkab-ot og hustisya. Ipaagi nato sa hudikatura. Bout ipasabot nga ikiha pa sa kapulisan ang suspek.

Pero pwede ni gamitan og 'old script' sa atong mga awtoridad ba nga dili mahulog nga salvaging o extra judicia killing. Unsa man nang 'old script'? Kanang kon sa drama pa sa radyo karaan na kaayo nga script apan mokita gihapon. Kana bang ang suspek samtang gi-iskortan sa mga pulis mangilog og armas o di ba mosuway pag-eskapo. Kon mahitabo ni, aw, pusilon.