Naglalis pa

Ning nakalabay nga mga adlaw, kanunay giulan ang Sugbo. Di ordinayo ang uwan kay daghan sa mga dapit nga nangaigo gibahaan. Kon ang baha kaniadto mahitabo lang panahon sa bagyo, karong panahuna lahi na. Matag bunok sa uwan, himuong suba niini ang kadalanan. Usa sa nakaingon niini mao ang kagagmay sa kadaghanan sa drainage system. Kanang di na makapiog sa gidaghanon sa tubig. Kadaghanan pa niini barado ug kuwang kaayo sa paglimpyo. Di na usab bag-o ang pagsampong sa mga basura sa mga kana lug kasapaan.

Ang nakapasamot karon ning suliran sa baha mao ang global warming. Mas daghang tubig ang dala karon sa uwan kay sa kaniadto. Mao ni ang labing dakong rason nganong di na makapiog ang mga agianan sa tubig sa gidaghanon niini.

Unta, gipatuman na sa kagamhanan, labina mga local government unit (LGU) ang mga drainage master plan nga sud na sa dugay nga katuigan, gitipigan sa kaban.

Ang kadtong pay master plan angayan nang mohimo kay di tiaw ang mao nga suliran. Bisan ang mga dapit nga di bahaanan kaniadto, lunopan na karon.

Ang suliran sa baha di masulbad sa tigi-tigi nga paagi. Nagkinahanglan kini og komprehensibo ug dako nga lakang. Busa,nagkinahanglan og binilyong pundo sa gobiyerno.

Sa pagkakaron, kasagaran sa mga drainage project pat ak pat-ak. Himuon kini kon dunay mohangyo ug kon duna nay magamit nga pundo, wa gibase sa komprehensibong plano.

Sa paspas nga kausaban karon sa panahon, ang utok sa mga opisyal sa kagamhanan wa moirog. Kon duna man, hinay sab kaayo silang nakasagop sa mga kalamboan.

Ang nakapait pa gyud kay kadaghanan kanila naglalis unsay sulusyon bisan kon naa na kini sa ilang atubangan. Mao na ang rason nganong hangtod karon nag-antos ang katawhan matag bunok sa uwan.