I did my best

Usa ka gabii ug mao pa lay pagsulod ko sa akong kuwarto pagkahuman namog panihapon, gipahibawo ko ni Mama nga naa sa among sala si Klark. Naghunahuna ko. “Sige na. Adtoa siya.” Hinay kong mitando. Sa wa pa ko mogawas sa akong kuwarto, gitan-aw ko si Baby Sam nga maayong pagkatulog sa kama. Matag kakita ko kang Baby Sam, mahinumdom dayon ko kang Klark. Di ko makalimot kang Klark tungod sa among anak nga puwerte gyud liwata niya.

Buotan kaayog hitsura si Klark dihang giatubang ko na siya sa sala. Namatikdan nako nga namiyahok ang duha niya ka aping.

“Pasayloa ko sa akong sayop, Susette.”

Mikagalkal ang tutunlan ni Klark, klaro nga kahilakon siya. Wa ko magtingog.

“Nagbasol na ko. Sila si Mama ug Papa kanunay naghandom nimo. Labaw na ko, Susette.”

Gitan-aw kog dugay si Klark. Siya pa gihapon ang gipitik sa akong kasingkasing.

“Gipasaylo na tika, Klark. Nakasabot ko sa imong tuyo nako ron. Not now. Pasagdan nato ang panahon nga maoy himuon natong guide kon kita ba gyud ang gipares sa Diyos. Nag-eskuwela na sab kog balik. Gusto kong humanon ang kurso nga akong gikuha. This time, di ko na pakyason sila si Mama ug Papa. Gusto gyud nila nga makahuman kog kurso.”

Nawala ang kaguol sa nawong ni Klark. Nagpahiyom na siya.

“Salamat, Susette, nga gipasaylo na ko nimo. Husto ka. Only time can tell kon para ba gyud ta sa usag usa. Huwaton ko nang higayona.”

Mitupad paglingkod si Klark nako sa gilingkoran kong taas nga sopa. Mikupot siya sa akong kamot. Gipasagdan ko siya sa iyang gibuhat.

“Unta ako ang guy nga para gyud nimo, Susette.” “Unta, Klark.” Gihatod ko si Klark kutob sa gawas sa among gate. Sa wa pa siya mobiya, gihagkan ko niya sa aping. Unya iya kong gigakos. Nabatyagan ko ang kainit sa iyang gugma nako.

Nanglabay ang mga adlaw. Makalakaw na si Baby Sam. Ug magduawan si Klark namo. Maayo na kaayo mig tinagdan sa usag usa. Ug nahibaw-an nako nga nagbinuotan na si Klark sa iyang pagtungha ug wa manguyab og laing girl.

Apan naghuwat ko sa hustong higayon kon kami ba gyud ang para sa usag usa, Ikalipay kaayo kini nako kon mahitabo kini. (KATAPUSAN)