Dihang nahigmata ang gabii
Gigakos ug gihagkan si Manuel sa iyang anak nga babaye, si Rosalie, upat ka tuig ang panuigon. May dala siyang mga gasa sa iyang anak – monyeka ug mga tsokolate nga mahalon. Hilabihang lipaya sa iyang anak ug nagsubli-subli kini paghalok sa iyang mga aping.
Gabii na apan mahayagon ang ilang eskuwater nga dapit sa reclamation area sa dakbayan sa Sugbo. May mga kutay sa mga sugang dagitabnon ang mga barungbarong kay may mga palusot nga gihimo aron masugaan ang ilang dapit. Kasagaran kanila mga sapian ug makasuburnog dagkong mga tawo sa katilingban.
Sanglit nakagurdo na sab og dakong kantidad si Manuel, may dala siyang sinugatan ug naglakip na niini ang lamiang mga pagkaon gikan sa inilang mga tindahan og pagkaon. Nagkasawo sila sa kinilong litsong baboy ug barbekyung manok. May ayskrem pang tunga sa galon sa ibabaw sa ilang talad. Ingon sa nagpista sila.
Mikaon man tuod ang iyang asawa, si Amalia, apan wala kini magmalipayon. “Dong Manuel, mopauli na kita sa atong lungsod. Natak-upan na ang inyong pabrika. Di na kita mabuhi dinhi. May daghang mga adis-adis dinhi. May mangawat ug manulis. Ug may manglugos pa gyud!” may dakong kabalaka ang iyang asawa nga migakos sa ilang anak.
“May kinitaan pa ko, Day,” nangatarungan si Manuel.
“Di permanente ang trabaho mo sa konstruksiyon. Namaligya ka pa gyud nianang gidiling drugas,” ni Amalia.
Nahikatawa siya. “Way angayng kabalak-an niana. Pulis ang druglord dinhi sa atong dapit. Way mosikop nako. Masapian ta dinhi.”
May daghan nang mga gabii nga nagpista sila sa kalipay tungod kay nagkadako ang iyang kinitaan sa gidiling drugas. Nagkadaghan na sab ang mga adis-adis.
Unya miabot ang laing gabii nga mingaab siya sa tumang kaguol ug kasakit. Halawom na ang gabii didto sa usa ka punerarya. Mihilak siya. Ang iyang asawa nga nagminatay paghilak nga naggakos sa usa ka lungon, nakuyapan ug natumba sa salog.
Wala siya magdahom nga kining gabhiona mao ang labing mangitngit nga gabii sa iyang kinabuhi. Gibasol niya ang iyan g kaugalingon ug buot niyang maghikog. Apan miduol ang iyang asawa sa iyang kilid ug may gihagawhaw dili lang sa iyang dalunggan, kundili sa kahiladman sa iyang dughan. “Dong Manuel, mopauli na gyud ta sa atong lungsod. May umahan didto. Malimtan ta didto nga gilugos ang atong anak nga babaye dinhi ug gipatay sa adis-adis!”
(KATAPUSAN)