SERVANIA PAKYAS

Nakapuntos og knockdown si Filipino Genesis Servania apan napakyas siya pinaagi sa unanimous decision batok kang Mexican Oscar Valdez kagahapon sa ilang World Boxing Organization (WBO) featherweight title fight sa Tucson, Arizona.

Gitumba ni Servania si Valdez sa 4th round pinaagi sa tuo niyang kumo apan nakabangon ra dayon ang Mexican ug nakalahutay kini paghuman sa round.

Si Valdez, kinsa misaka sa 23-0, 19KOs nga baraha, mibawi sa 5th round ug iya sab gitumba ang lumad nga taga Bacolod City pinaagi sa iyang left hook.

Si Servania, kinsa natagak sa 29-1, 12KOs nga baraha, miparag ni Valdez sa hinapos nga bahin sa 6th round.

Human niadto, nagpasudlanay na og mga kumbinasyon ang duha ka mga boksidor diin mipatigbabaw si Valdez, kinsa midominar sa scorecards sa tulo ka judges, 116110, 119-111 ug 117-109.

Nagkanayon si Valdez nga wala siya magtuo nga matumba siya sa away batok sa usa ka dili iladong boksidor.

“I never thought I was gonna be on the canvas like that,” asoy ni Valdez sa interbyu sa ESPN.

“But this is boxing. This is what it is. To be completely honest, I wasn’t really hurt. I was really surprised. I was like, ‘OK, I’m on the floor. But now, nothing happened. I’m gonna get up and I’m gonna do my work.’”

Si Servania, kinsa kanhi kanhi sakop sa bantugang ALA stable sa Sugbo sa wala pa kini nitapon sa Japan, miaway sa labing una niyang tahas sa Amerika.