CONGRATS, JHACK!
Gipaila ni Jhack “El Capitan” Tepora ang iyang kapabilidad sa tibuok kalibutan pinaagi sa impresibong 2nd round TKO nga kadaugan batok kang South African knockout artist Lusanda Komanisi kagahapon aron ilugon ang World Boxing Organization (WBO) Inter-Continental featherweight title sa Orient Theatre sa East London, South Africa.
Usa ka makusog nga right
cross nga kumo ni Tepora ang brutal nga nagpatumba kang Komanisi, kinsa daw naglupad sa iyang pagkahagba kay dungan nga miisa ang iyang duha ka mga tiil.
Si Tepora, 24, misaka sa 210, 16KOs nga rekord samtang si Komanisi natagak sa 21-4, 18KOs nga baraha.
Sa messenger video call ning mantalaan, mapasalamaton si Tepora sa mga nagdumala kaniya sa Omega Pro Sports International (OPSI) hilabi na sa Kahitas-an sa naangkon niyang kalampusan.
“Nagpasalamat ko sa Ginuo nga midaog ko. Nakauna lang ko ato kay knockout puncher sab to ang akong kontra,” matod ni Tepora, kinsa lumad nga taga siyudad sa Sugbo.
Si Komanisi, kinsa gianggaan og School Boy, misuway pa sa pagbangon apan nibarag ra kini hinungdan nga giundang na sa referee ang away.
Gipasabot ni Tepora nga pagsugod pa lang sa away, tinguha na niyang i- knockout si Komanisi.
“Ang among game plan kay knockout- ton gyud nako siya kay kahibalo mi nga dili mi modaog kon moabot sa desisyon,” pasabot ni Tepora, kinsa giubanan sa iyang trainers nga sila si Jinggoy Junco ug Jing-Jing, kinsa iya sab igsuon.
Sa kadaugan, gilaumang makasulod na si Tepora sa top 10 sa WBO featherweight rankings diin iyang ikauban ang laing Pinoyng mga boksidor nga sila si Mark Magsayo (No. 2) ug Genesis Servania (No. 4).
Sa interbyu sa www.philboxing.com, nagkanayon si James Osorio sa OPSI nga wala sila magmakuli sa pagdawat dihang mitanyag ang kampo ni Komanisi gumikan kay gusto nilang masukod kon unsa gyu’y ikabuga ni Tepora.
“We accepted the fight because we want to know how Jhack would perform on the road. That’s a test to see if he really has it,” matod ni Osorio. Kini maoy labing unang higayon nga miaway si Tepora sa gawas sa nasod.
Si Komanisi usa ka dekalidad nga boksidor nga mibiktima sa laing Pinoy nga si Roli Gasca sulod sa duha ka mga higayon.
Gilupig ni Komanisi si Gasca pinaagi sa split decision sa premirong away unya iya kining gi-TKO sa 5th round sa ilang rematch.