Tabang, ayaw dayon panaway

Niawhag si Presidente Rody Duterte sa mga kaparian ug mga obispo sa Simbahang Katoliko sa pagtabang sa kampanya sa gobyerno batok sa ilegal nga drugas.

Matod pa niya, angay nga motabang ang simbahan sa kampanya batok sa illegal nga drugas kay kadtong nahilambigit sa illegal nga drugas mga parokyano man sa simbahan.

Nagkanayon siya nga mao unta kini ang pagabuhaton sa simbahan inay sa pagkondenar sa gubat batok sa illegal nga drugas. "These priests, they easily condemn the government's anti-drug war," matod pa niya.

Gikondenar sa simbahan ang gubat kontra druga nga nikalas sa kinabuhi sa liboan ka mga suspetsado sa illegal nga drugas. Kadaghanan sa nangamatay mga kabus. Ning bag-o naglakip na kini sa mga batan-on.

Ang presidente niingon nga iyang ihatag ang iyang "narcolist" ngadto sa kaparian aron sultian sa mga pari ang nalakip sa maong listahan sa pag-undang na.

"They are alive, you talk to them and tell them they would end up in a very serous situation if they contnued," matod pa sa pangulo. Usa kini ka preemptive move sa kaparian, matod pa niya.

Lakip sa gustong pahunungon sa presidente sa ilang kalambigitan sa illegal nga drugas mao ang mga barangay kapitan.

Matod pa niya 40 porsento sa mga kapitan nalambigit sa illegal nga drugas. Mao kini ang hinungdan nga wa niya sila ilakip sa gubat kontra druga kay di na sila kasaligan.

Apan wa siyay gihinganlan sa mga kapitan sukwahi sa mayor, tulo kanila napatay sa managlahing hitabo.

Apan dunay pamahayag ang pangulo nga hayan maglatid sa lagda sa gubat batok sa illegal nga drugas.

Una mao nga di niya policy ang pagpatay sa mga suspetsado sa illegal nga drugas, ilabi na sa kabatan. Ikaduha, ang gubat kontra druga wa itumong batok sa mga kabus.

Pangutan-a lang ang pulis. "If anyone of them stand up and say I ordered them to kill the poor and the children I would resign because that would make me a liar," matod pa niya.