BABAYE GIPATAY, GILABAY
INAHAN MITUMBOK SA KANHI UYAB SA ANAK NGA MAOY KILLER
Babaye gipatay ug gilabay duol sa iyang balay sa Phase 3B, Camella Homes, Barangay Linao, dakbayan sa Talisay kagahapon.
Iyang boyfriend ang gitumbok sa iyang inahan nga maoy posibleng nagpatay, apan ang kapulisan sa dakbayan sa Talisay nagdumili pa sa pagkomentaryo kay nagpadayon pa ang ilang imbestigasyon.
Gituohan nga nianang sayo pa sa buntag gipatay si May Alvasin, 33, tag-iya og lotto outlet, apan pasado alas 9 sa buntag nakit-an ang iyang lawas daplin sa karsada.
Duna siyay tulo ka mga samad pinusilan, usa sa tiyan, usa sa wala nga paa ug usa sa tuo nga bukton.
Si PO3 Jason Del Campo sa Talisay City Police Station niingon nga nakadawat sila og tawag gikan sa mga nagpakabanang tawo sa giingong patay nga babaye.
Usa sa mga lumolupyo sa lugar nga si Delio (di tinuod nga ngan), 44, nibutyag nga sakay sa usa ka puti nga sakyanan ang nilabay kang Alvasin.
Apan for registration pa ang plate number niini.
Mao usab kini ang nakuha sa mga close circuit television camera (CCTV) camera sa mga balay nga duol sa gilabayan sa lawas.
Ang balay ni Alvasin gibana-banang mga 20 metros lang gikan sa dapit diin gilabay ang iyang lawas.
Si Nelly (di tinuod nga ngan), silingan ni Alvasin, niingon nga tag-iya og lotto ug naa lang sa 10 ngadto sa 20 metros ang balay niini gikan sa lugar nga siya gilabay.
Panagsa ra mogawas ug makig-estorya kanila si Alvasin ug di pa usab dugay nga nagpuyo sa lugar.
Si Remy Alvasin Logan, inahan ni May, sa interbyu sa Superbalita Cebu, niingon nga usa ka driver ang nipahibawo kaniya nga dunay babayeng gipatay ug gilabay ang lawas niini duol sa gipuy-an.
Human niya mahibaw-i nga ang biktima tag-iya sa usa ka
lotto outlet, nahibawo na siya nga iya na kining anak.
“Paspasi og padagan, Dong (driver sa habalhabal),” asoy ni Remy.
Sa iyang pag-abot, iyang nakita ang lawas sa iyang anak nga nagbuy-od. Ningaab siya sa paghilak. Dihang gipangutana kon kinsa ang gidudahan niyang nipatay sa iyang anak, si Remy nitumbok sa usa ka lalake nga giingong uyab niini.
Ang Superbalita Cebu nipugong una sa ngan sa suspek kay ang kapulisan nagdumili pa sa pagluwat og pamahayag kay nagpadayon pa ang ilang imbestigasyon.
Matod niya gibuwagan sa iyang anak ang suspek kay mangulata.
Gani gireklamo na man kini ni May sa kapulisan.
Asoy pa ni Del Campo nga di pa sila makabutyag sa motibo.
Siya nagkanayon nga ang alegasyon sa inahan susihon pa sa mga awtoridad. /