64 ka pamilya sa Bantayan gibahaan, gipabakwit

Labing minos 64 ka mga pamilya sa mga lungsod sa Sta. Fe ug Madridejos sa isla sa Bantayan ang gipabakwit niadtong Lunes tungod sa baha mugna sa kusog ug way hunong nga pag-ulan.

Gipahibawo sa Provincial Disaster Risk Reduction Managament Office (PDRRMO) nga 48 ka mga pamilya sa Brgy. Okoy, Sta. Fe ang namakwit gikan sa ilang mga pinuy-anan nunot sa baha nga niabot na og taga tuhod.

Hinuon sa susamang adlaw, nabalik ra sila sa ilang mga pinuyanan human nihubas ang baha.

Sa laing bahin, si PDRRMO head, Baltazar Tribunalo mismo niingon nga duna sa’y bahin sa lungsod sa Madridejos nga kanunay nga lunopan kon dunay kusog nga ulan.

Sa nakuha sa iyang buhatan, moabot sa 16 ka mga pamilya sa brgy. Bunakan, gipabakwit ug didto na nagpabuntag sa barangay hall samtang gipaabot ang pag-ubos sa tubig sa ilang dapit.

Giabaga sa lokal nga kagamhanan ang pagpakaon sa mga bakwit. Hinuon kagahapong adlawa, nakapauli na ang mga apektadong residente.

Nabalik na hinuon ang maayong panahon sa isla kagahapong adlawa.

Si Tribunalo nakadawat sab og report labot gihapon sa pagbaha sa di momenus lima ka mga barangay sa lungsod sa Compostela.

Wala ra hinuoy natala nga casualty sa mga nataho nga insidente sa pagbaha sa isla sa Bantayan ug Compostela.

Padayong nipahinumdum si Tribunalo sa mga tawo nga nagpuyo sa mga danger zone nga di na paabuton nga mabiktima pa sila sa katalagman una sila mamalhin sa mas luwas nga dapit.

Gusto ni Tribunalo nga mobalhin na sila sa mga lugar nga di risgo sa pagdaut sa panahon.