WALAY HULGA SA TERORISTA SA CV
Kapulisan sa Central Visayas miklaro nga wala na sila makadawat ug hulga sa teroristang pagpangatake bisan pa man sa padayong travel band sa habagatang bahin sa lalawigan sa Sugbo.
Kahinumdoman niadotong Septiyembre 22 mipagawas na usab og travel advisory ang U.S Embassy nunot sa nadawat nga impormasyon nga dunay hulga sa pagpanagit sa ilang mga citizens.
Tungod niini ilang giawhag ang mga turistang Amerikano nga likayan lang una ang pagbyahe sa mga coastal area sa Southern Philippines, usa na niini ang habagatang bahin sa lalawigan sa Sugbo.
Si Sr. Supt. Jonathan Cabal hepe sa Regional Intelligence Division miklaro nga walay angay nga ikaalarma sa maong advisory sa America sanglit padayon ang ilang hugot nga pagbantay sa mga bisita sa mga tourist destination sa probinsya sa Sugbo.
Wala hinuon niini gipakagamay ang nadawat nga impormasyon sa kagamhanan sa nasud sa America nga maoy hinungdan nga ilang gipalig-on ang ilang intelligence monitoring pinaagi sa pagpakig-alayon sa ilang counterpart.
“Yung advisory din kase ng U.S the previous day really somehow up the tempo for give us more room for improvement, we have to be vigilant,” matod ni Sr. Supt. Jonathan Cabal.
Sa miaging semana atol sa Asean Summit nga gilusad sa isla sa Panglao probinsya sa Bohol, ilang gituki usab ang giingong hulga sa terorista apan wala silay nasagap nga impormasyon nga dunay presensya niini sa Central Visayas.
Angay na nga wagtangon ang travel advisory nga giisyu sa pipila ka mga nasud.
Kini gumikan kay wala silay nabantayan sa kabisay-an nga dunay mga mga teroristang grupo. Ang hepe sa Cebu Provincial Police Office (CPPO) mipasalig nga luwas pa ang tibuok probinsya sa Sugbo ilabi na ang south area tungod sa padayong presensya sa Task Force Cebu ug ang tourist police. Mga sakop sa Philippine Navy padayon nga nagpatrolya sa kadagatan sa Somilon Island, Santander, Badian, Moalboal, Samboan, Oslob ug Dalaguete nga maoy ginganlan sa mga nasud nga gidili nga bisitahon tungod sa kataas sa hulga.
“So, hanggang ngayon tuloy-tuloy ang aming usapan sa internal group, how we guard Somilon island at ibang mga
tourist destination so sa ngayon okey naman” matod ni Sr. Supt. Eric Noble.
Kahinumdoman nga niadtong milabayng tuig mipagawas usab sa susamang pasidaan ang nasud sa America, Australia, Canada ug uban pang mga nasud human makadawat ug report nga dunay presensya sa Abu Sayyaf.
Niadtong Abril nakurat ang kapulisan ug kasundalohan sa Central Visayas human ma engkwentro ang mga terorista sa lungsod sa Inabangga, lalawigan sa Bohol.