Select the best
Nahuman na lang ang semester, wa pa gyud koy napili kanila ni Lemuel ug Loue. Nakahunahuna ko sa pagbakasyon sa akong uyoan nga naminyog taga Ginatillan aron kahatagan kog higayon ang akong kaugalingon nga mahilayo sa duha ko ka suitors kay tingalig makadesisyon na ko kon kinsa kanila ang akong sugton. Apan sa wa pa ko moadto sa Ginatilan, nagpaenroll ko daan para sa next semester.
Nindot ang lungsod sa Ginatilan. Sa akong paniid, peaceful ang maong lugar. Dug-ol ra sab ang simbahan ug ang munisipyo. Tin-aw ug limpiyo ang dagat. Duol ra sa dagat ang balay sa akong uyoan. Duna silay usa ka anak nga babaye nga puparehas nakog edad, si Shiela. Dali ra ming nagkasuod. Kanunay ko niyang isuroy. Usahay mangaligo mi sa dagat.
Unya gikaila ko si Gerald. Si Shiela ang nagpaila-ila namong duha. Best friend ni Shiela si Gerald. “Guwapo, no, Gaw.” Mikidhat si Shiela nako samtang naghigda mi sa iyang kuwarto usa ka gabii ana. Dako ang iyang kama ug nagdulog mi. “Bitaw.” “Wa siyay uyab, Gaw. Pilian og girl.”
“Basig laki ang iyang gusto?”
Nagkinataw-anay mi si Shiela. Nahapak niyag hinay ang akong bukton. Nakasabot siya sa akong giingon.
“Di man siya bayot, Gaw. Kuan lang gyud, hinayon lang siyag lihok.”
“Namatikdan ko bitaw, Gaw. Morag di siya makabuak og baso. Parion siyag hitsura.”
Nahilom si Shiela. Mitakilid siya paghigda paingon nako. iya kong gitan-aw og dugay.
“Ikaw, Gaw, may uyab na ba?”
Nakadesisyon ko nga tuganan si Shiela bahin kanila ni Lemuel ug Loue.
“Lisora sab anang imong sitwasyon, Gaw, uy. Parehas nimo silang love? Aw, sugta na lang silang duha aron di ka na mahasol ug maglibog?”
Mikatawag kusog si Shiela. Nakapanglingo na lang ko sa kasiawan sa akong cousin. “Bitaw, Gaw, Letlet, select
the best. Kon security, kana bang giingon nga secured sa kinabuhi kon magminyo, si Loue ang sugta.”
“Di man kana ang akong gibasehan sa pagpili nila, Gaw.” Nanghupaw ko. “Ang gusto nako, kon kinsa man ang akong sugton nila, kana gyung love kaayo nako siya.”
“Bitaw, Gaw. Mao gyud nay sakto.”
Sa kanunay namong pagkuyug-kuyog ni Gerald, nagkasuod gyud mi. Hangtod nga nangulitawo siya nako. (SUMPAYAN)