Ang ganghaan ni Servania
Pakyas man tuod sa iyang unang pagsuway og langkat sa world title niadtong Dominggo apan ang gipakita ni Genesis “Azukal” Servania sa iyang away batok ni WBO world bantamweight champion Oscar Valdez didto sa Tucson, Arizona nakakuha og igong atensiyon sa boxing aficionados.
Kadto mao unyay magsilbing yawi sa dugang pang kahigayonan sa katumanan sa iyang damgo.
Sa sayo pa, daghan ang mga nangagpas nga dili makalahutay og dugay si Servania sa mga kumo sa giilang usa sa pinakamaayong boksidor karon, apan ang iyang kaisog, kalig-on ug dakong determinasyon maoy nagpamatuod nga sama sa uban anaa siyay kapabilidad nga mamahimo usab nga world champion sa umaabot nga mga adlaw.
Tinuod nga sayo nga gidominar siya ni Valdez ginamit ang bintaha sa gitas-on sa unang tulo ka rounds, apan sa fourth, sa wala damha, napatumba sa lumad nga taga dakbayan sa Bacolod si Valdez nga nakapahilom sa makadiyot sa iyang mga fans sulod sa arena.
Si Valdez naila sa iyang kaagresibo nga moaway nga adunay igong estelo ug kusog nga maoy igong rason kon nganong hangtod karon nagpabiling undefeated champion sulod sa 23 ka away diin 19 niini iyang gipang- knockout.
Apan batok ni Servania, tataw nga nawala ang iyang kaagresibo ug ang iyang pagkatumba nagpasidaan kaniya nga si Servania dili usa ka ordinaryong challenger.
Sa pagtuo nga mamilegro kon siya perming mopaduol ug mosagol ni Servania, si Valdez inanay nga mi- adjust sa iyang estelo ug permi na kining modestansiya ginamit ang iyang kaidlas.
Iyang man tuod nabawsan ug natumba si Servania sa ikalima ka round apan sukwahi sa iyang gituohan, dali kining mibarog og daw sama sa usa ka masuk-anong lion, wa molubad sa iyang kaisog ug padayon hinuon nga miatake.
Kini nakapasantop na usab sa hunahuna ni Valdez nga ang Filipino challenger kinsa wa gani makaagi isip amateur fighter, aduna usay igong kalig-on.
Sa ikaunom ka round, sunodsunod nga kombinasyon ang gibuhian ni Servania nga miigo sa nawong ni Valdez ug maayo na lang kay naabtan sa pagpapupos sa oras sa maong round.
Apan gikan sa ikapito ngadto na sa nahabiling mga rounds, ang kalantip man tuod ni Valdez maoy mipatugbabaw apan wa kini makapahupas sa panglimbasog ni Servania uban sa panghinaot nga sa makausa pa, makaantimano ni Valdez.
Sa ika-onse ka round, naparogi na usab ni Valdez si Servania apan sa ikadose ug katapusang hugna, sinukliay sa ilang tagsa-tagsa ka mga kombinasyon sa mga kumo maoy mipahugyaw og nakapalingaw sa mga tawo.
Sa mata sa tulo ka mga judges, way gidag-an si Servania sa sumada sa ilang scorecard apan ang iyang gipakita sa maong away nga wala damha maoy nahimong sumsuman sa kadaghanan.
Mga big time boxing promoters nga naglakip ni Bob Arum, ang big boss sa Top Rank Promotion, ang nakombinsi ug naglaraw sa paghatag na usab og laing away ni Servania didto sa Estados Unidos.
Taliwala sa kapildihan nagpahipi ang anino sa iyang kadaugan ug kini mao ang katam-is sa usa ka boksidor nga gitawag og “Azukal” kinsa sa edad nga 15-anyos napugos sa pag-undang sa pag-eskuwela ug nag- tricycle driver aron makaabag sa iyang inahan.
Sa 30 ka professional fights, si Servania anaa na haduol sa ganghaan sa kalampusan – ug kini mao ang paghaw-as gikan sa kalisod ug ingon man ang paghatag og dungog alang sa nasod.
Keep up the good work, Genesis.