Tallo mipadaog sa San Remigio cagers

Giaswat ni Mark Jayven Tallo ang San Remigio Properties sa makutas nga kadaugan, 105-98, batok sa Chriswil sa katapusang adlaw sa elimination round sa

2017 Talisay City Mayor’s Cup Open Commercial Invitational Basketball sa Talisay City Sports Complex.

Sa kadaugan, ang San Remigio maoy nakakuha sa no. 1

spot sa Bracket A samtang ang napukan nga Cristwil maoy misakmit sa no. 2 spot.

Ang Fighter Wine nga sama sa San Remigio ug Cristwill aduna sab 1-1 nga baraha sa

elimination round maoy nataktak human sa quotient system nga maoy mideterminar sa top two teams.

Sa quotient system, migawas nga ang San Remigio adunay 1.027 points samtang ang Christwil mitali og 1.023. Samtang ang Fighter Wine mitapos nga may 0.95.

Sa sayo pa sa Bracket B, kulbahinam usab nga gipatapsingan sa Aspa Formworks and Scaffoldings ang Talisay-based Kimlex, 92-90, aron usab paglabni og luna sa semifinals round nga ipahigayon karong gabii.

Sama sa Bracket A, namugna usab ang triple tie tali sa Kimlex, Aspa ug SG-ARQ. Apan sa

quotient system migawas usab nga ang Kimlex maoy nakahulbot sa no. 1 nga slot nga may 1.079 points, nga gisundan sa Aspa nga may 0.989.

Ang SG-ARQ maoy nakakuha sa pinakaubos nga tali sa

quotient nga may 0.936. Karong gabii gituohan nga saktong kombati ang masaksihan sa duha ka panag-engkuwentro. Hinuon giduhaduhaan pa kon makaduwa ba ang pambato sa San Remigio nga si Tallo kinsa gikataho nga atoa sa Manila aron paghikay sa mga papeles sa iyang pagpadraft unya sa PBA.

Samtang sa seniors divison, mag-abot sa semifinals ang Biasong ug Cansojong ug ingon man ang San Roque ug Tanke. Ang duwa ipahigayon sa Septiyembre 29.