Bolts, Elite magtinagakay
Duwa karon 7:00 pm- Meralco batok Blackwater
Magtinagakay ang Meralco Bolts ug Blackwater Elite sa nag-inusarang duwa karong gabii sa quarter-finals sa Philippine Basketball Association (PBA) Governor’s Cup sa Araneta Coliseum.
Niadtong Martes, ang No.8 team Elite nakakita pa og laing pagsidlak sa adlaw human sa ilang surpresang 92-91 nga kadaugan batok sa Bolts nga naggunit og kaduha pildehon nga bintaha isip benepisyo sa ilang pagkahimong No.1 team human sa elimination round.
Gipahimangnuan ni Blackwater import Bill Walker ang iyang mga kauban nga modugang pa og kayod aron makompleto nila ang ilang pagbangon batok sa grabe ka inilog nga Bolts.
“We were fortunate to make enough plays and keep it close so we could strike in the end, but I warned the guys, they’re a championship caliber team,” asoy ni Walker sa interbyu sa Spin.ph.
“We just poked the bear. And if you’re from the country like I am, you gotta be ready what happens when the bear turns around.”
Si Meralco coach Norman Black nagpabiling malaumon sa ilang poruhan.
Sa laing bahin, naangkon sa Star Hotshots ang labing unang puwesto sa semi-finals human nila gipalagpot ang NLEX Road Warriors, 89-77, sa laing duwa niadtong Martes.
Sa best-of-five semi-finals, ang Star makigharong sa modaog tali sa Meralco ug Blackwater karong gabii.