ILOG SA NO.1
Seguradong luna sa No.1 ang tinguha sa defending champions University of the Visayas (UV) Green Lancers sa ilang pagpakigbatok sa University of San Jose Recoletos (USJR) Jaguars sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Human nila gipanglampornas ang Southwestern University (SWU) Cobras, 94-64, niadtong Martes, ang Green Lancers ni coach Gary Cortes mipahugot sa ilang paggunit sa liderato dala ang 9-1 nga rekord ug nakaseguro na’g puwesto sa top two.
Ang makasulod sa top two maggunit og kaduha pildihon nga bintaha sa semi-finals diin magparang ang No.1 team batok No. 4 ug No.2 batok No.3.
Ning puntoha, dili pa gihapon maseguro sa Green Lancers ang No.1 nga luna ug posible pa silang maapsan sa Jaguars kon mapilde sila ning kombatiha.
Ang Jaguars ni coach Jun Noel, nga nakaseguro na sab og puwesto sa top two, sikit nga nagsunod sa Green Lancers sa ikaduhang dapit bitbit ang 8-2 nga rekord.
Sa premiro nilang panagsangka niadtong Agusto 24, gilupig sa Green Lancers ang Jaguars og walo ka mga puntos, 84-76.
Nagpasabot kini nga kinahanglang modaog ang Jaguars og labing ubos siyam ka mga puntos aron malupig nila ang Green Lancers sa sitwasyon
nga magtabla ang ilang standing human sa double round robin elimination.
Ang Green Lancers ug Jaguars parehong aduna na lay duha ka mga duwa nga nahabilin sugod karon.
Sama sa naandan, ang Green Lancers magsalig og maayo nila ni MVP Rey Suerte, Jerome Napao, Josue Segumpan, Monic Soliva, Tristan Albina, ug import Basseiru Sackor.
Sa ilang bahin, ang Jaguars mosandig og maayo sa katakos nila ni Victor Nunez, Julius Pacanuayan, Ralph Dinolan, Albert Catiloc, Miguel Gastador ug Jaybie Mantilla.
Sa premirong duwa, magsangka ang University of San Carlos (USC) Warriors batok University of Cebu (UC) Webmasters. Ang Warriors kasamtangang naa sa ikatulong dapit dala ang 6-4 nga rekord unya naa sa ikaupat ang Webmasters bitbit ang 6-5 nga baraha.
Kon buot hunahunaon, wala na kaayo’y bili alang sa Warriors ug Webmasters kining sangkaa gumikan kay pareho na man silang nakasulod sa semi-finals ug ang No.3 na lang nga luna ang ilang ilugan.
Sa premiro nilang enkuwentro, ang Warriors nagkinahanglan pa og overtime una nila nalupig ang Webmasters, 67-62, niadtong Agusto 20.
Gilauman ang laing kulbahinam nga aksyon ang makasaksihan panagsangka og balik sa duha ka mga kampo./