TINUN-AN MIAMBAK SA 7TH FLOOR

BABAYENG 12TH GRADE PATAY NA NGA MIABOT SA OSPITAL

Babayeng tinun-an nga niambak sa ikapitong andana sa ilang tunghaan patay nang midangat sa tambalanan kagahapon pasado alas 4 sa hapon sa may dan Leon Kilat, dakbayan sa Sugbo.

Wa na matabang pa sa mga emergency medical personnel sa Brgy. Sambag 2, dakbayan sa Sugbo si Jonah Villarin, 17, taga Hills View, Brgy. Tisa, dakbayan sa Sugbo.

Si Villarin tinun-an sa 12th grade sa Asian College of Technology, International Educational Foundation.

Si Sr. Inspector Jacinto Mandal Jr., hepe sa Carbon police station sa Cebu City Police Office (CCPO) niingon nga base sa imbestigasyon sa iyang mga sakop, si Villarin niambak gikan sa 7th floor comfort room.

Nahitabo kini mga alas 4 sa hapon, apan mga alas 4:30 na sila gialarma.

Si Villarin didto na mitugpa sa likod sa edipisyo sa tunghaan.

Wa na nila maabti pa si Villarin kay gidala na kini sa emergency medical responders ngadto sa Visayas Community Medical Center (VCMC).

Matod ni Mandal nga dead on arrival si Villarin sa ospital.

Ilang nasayran gikan sa usa ka maestra nga “family problem” ang posibleng hinungdan sa pag-ambak sa dalaga.

Apan wa na mohatag pa og dugang detalye ang maestra.

Nasayran usab sa Superbalita Cebu nga niabot sa dapit ang uyab ni Villarin human pahibaw-i pinaagi sa text message sa mga

classmate sa nahitabo sa babaye. Sa hulagway sa SunStar Cebu sa dapit diin didto pa ang lawas ni Villarin, usa ka batan-ong lalake ang gikulata sa usa ka hamtong nga lalake.

Ang uyab gi-hold pa sa kapulisan alang sa dugang imbestigasyon.

Ang Superbalita Cebu makadaghan nitawag sa school

administration, apan gipahibawo kini nga nagtigom pa ang kadagkuan sa pagsuwat ning taho. /