13 ANYOS NGA AKYAT BAHAY NADAKPAN
Menor de edad nga nagpangidaron pa 13 anyos nga lalake nga notado na sa pagpangawat sud sa kabalayan sud sa 30 ka higayon, na rescue sa kapulisan sa syudad sa Sugbo human masakpi sa tag-iya sa balay nga iyang gisaka sa milabayng gabii sa barangay Quiot, dakbayan sa Sugbo.
Niadtong Huwebes, gi-turnover na sa usa ka concerned citizen si alyas Dodong nga taga Brgy. Buhisan human siya masakpi nga nanguha og butang sud sa usa ka panimay sa Barangay Buhisan.
Apan, gibuhian siya human wa dawata sa usa ka ahensya nga mao unta ang gitahasan nga mokustodiya sa mga menor de edad.
Apan pipila lang ka oras siya gipapauli sa ilang pinuy-anan, lain na usab nga panimay sa barangay Quiot ang gisaka.
Matod ni Chief Insp. Ramoncillo Sawan, hepe sa Punta Princesa police station, nga makadaghan na gireklamo ang maong bata apan makagawas ra usab tungod sa iyang pangidaron nga di mahimong pasakaan og kaso.
Nabilango na usab ang mga ginikanan ni Dodong sa kasong pagpangawat niadtong 2014.
Niadtong mga panahuna kauban ang bata sa iyang pagsulod sa target nilang panimalay.
“Later on, nahibaw-an nato nga ang iya diay inahan pud is recidivist nga tigpangawat sa atong record. Naa siyay lima ka incident sa pagpangawat,” matod ni Sawan.
Giangkon ni Dodong nga nagsugod siya sa pagpangawat sa nag edad pa siya og 9 anyos sa dihang ubanon siya sa iyang inahan sa pagsulod sa mga balay.
Matod niya nga moabot na sa 30 ka mga panimay ang iyang nasaka ug gipanguha ang kwarta, alahas, cellphone ug uban pa ug iya dayon ihatag sa iyang inahan nga nagbisyo sa illegal nga drugas.
“Manguha ko og kwarta, alahas, cellphone unya ako dayon ihatag ni mama. Ang kwarta ipalit nako og rugby nya si Mama kay mosuyop,” matod ni Dodong.
Dugang sa bata nga kon mobalibad siya sa sugo sa iyang inahan, kulatahon siya niini ug pasoan sa giduslitan nga straw sa softdrink tumong sa iyang paa nga hangtod karon maklaro pa ang ulat niini.
Human niadto, makabatyag na siya og kainit ug kakatol sa iyang palad nga maoy motukmod niya nga mosulod og balay nga dili mabantayan sa mga tawo.
Iyang gitug-an nga naabot siya sa Naga, Talisay, Pardo, Quiot, Banawa, Mandaue ug Liloan sa iyang pagpangawat sud sa mga balay.
Iya pang gipakita sa mga tigbalita kon unsa siya ka experto moabli sa mga de numero nga kandado ug sud lang sa usa ka minuto, iya ning maablihan.
Human siya makuha sa kapulisan, nisaad siya nga mag bag-o na sa iyang kinabuhi ug andam siya mobalik og tungha sanglit kutob lang siya sa grade 1.
Tinguha niya nga mahimong usa ka pulis inig ka dako.
Tungod kay menor de edad si Dodong, di siya mahimong bilangguon. /