Uyab sa babaye nga gipatay sa Talisay nasikop sa Zamboanga

Hinigugma sa babayeng gipatay ug gilabay sa dakbayan sa Talisay nasikop didto sa Mindanao human nakagawas na dinhi sa Sugbo.

Kapulisan nikonsiderar na sa uyab nga maoy suspek sa pagpatay. Gikataho nga nakasibat na si Leo Zafra sa Sugbo ug didto na masikop sa Zamboanga del Norte.

Patay nang nakaplagan si May Albasin duol sa iyang balay sa Camella Homes, barangay Linao, dakbayan sa Talisay niadtong Martes sa buntag.

Usa ka tawo nga nagsakay sa usa ka sakyanan ang nilabay sa lawas, base sa kuha sa mga close circuit television (CCTV) sa mga balay sa dapit.

Gibutyag sa inahan ni Albacin nga si Remy Logan nga Leo Zafra, uyab sa iyang anak, ang suspek.

Iyang gibutyag nga kanunay kulatahon ni Zafra ang iyang anak tungod sa giingong selos.

Matod pa ni Supt. Jason Villamater, pangu sa kapulisan sa Syudad sa Talisay, nga ila nang gikonsiderar nga suspek si Zafra tungod sa ilang gihuptan karon nga mga ebedensiya ug testimoniya sa inahan.

Kagahapon,si Villamater mipahibawo nga si Zafra nakasibat na gawas sa Sugbo, apan nakadawat silag tawag gikan sa kapulisan sa Sergio Osmeña Sr., Zamboanga del Norte nga nasikop si Zafra.

Matod ni Villamater nga nagduda ang kapulisan sa lihuk ug pagkatawo hinungdan nga gipangayuan og identification (ID)

cardug didto nasuta nga si Zafra. Ang hepe sa maong dapit mao nay nitawag kang Villamater aron pagkonpirmar sa ngan kon Taga Talisay ba usab kini.

Didto gipahibawo ni Villamater nga ila kining gipangita ug nihangyo sa hepe nga ipa-hold lang una sanglit aduna siyay pulis nga palargahon aron ipakuha si Zafra.

Apan sa wa pa gipalarga ang iyang mga sakop niadtong Miyerkules sa gabii, nagpadala una si Villamater og hulagway ni Zafra sa kapulisan.

Nitakdo ang panagway sa maong tawo ngadto sa ilang picture nga nakuha usab sa kapulisan sa Talisay.

Matod ni Chief Inspector Romar Victoriano Alfanta Lim, hepe sa kapulisan sa mao nga lungsod, nga si Zafra nangayog tabang sa Brgy. Venus sa mao nga lungsod.

Nisulti si Zafra kanila nga siya gitulis samtang ang mga lumolupyo nagpatabang sa mga barangay tanod.

Mga alas 2 sa hapon gidala siya sa police station diin siya nakuhaan og .38 kalibreng revolver nga way lisensya.

“Initially mao na nga basis nga ma hold siya. Upon interview very confusing, makaduda ang story why naabot sa munisipyo. Iyang report nga gi- hold

up siya. Walay signs nga nahold up siya,” nagkanayon si Lim sa Superbalita Cebu.

Hinuon gitataw ni Villamater nga bisan og ila nang nakuha si Zafra di pa sila makakonsiderar nga sulbad na ang kremin. / DRT