FLORENTINO'S, TAGAYTAY SA CEBU
Gilayuan ug gikapoyan ka sa pag-adto sa Tagaytay City aron unta imong masudong ang maanindot nga talan-awon sa kabukiran ug
kadagatan kansang gasa iya sa kinaiyahan?
Di na kana problema kay mismo sa lalawigan sa Sugbo imong matagamtaman ang daw susama nga kasinatian nga di sakit sa bulsa.
Bisitaha ang Florentino’s nga nahimutang sa Barangay Gaas, lungsod sa Balamaban diin iyang mga silingan ang buwakan ni Alejandra ug Balamban Adventure Cafe.
Ang lugar gitawag sa mga lokal ug langyaw nga turista nga “Little Tagaytay de Cebu” sanglit ang lugar adunay kapareho nga panagway sa Tagaytay.
Kon ang Tagaytay adunay Taal nga bulkan sa iyang atbang, ang Little Tagaytay de Cebu aduna say bulkan sa Kanlaon sanglit makita didto sa Negros Oriental.
Labaw sa tanan ang atangan sa mga tawo nga moadto mao ang maanindot nga talan-awon sa pagsawop sa adlaw kon sunset nga sama sa Tagaytay makadani ang iyang katahom.
Matag karon ug unya, bisan alas 12:00 ang takna sa kau- dtuhon depende sa klima sa panahon (samot na sa buntag og dayong kilumkilom) ang lugar mogabon ug masinati ang kabugnaw sa panahon.
Si Florentino “Jun” Impas, usa ka sikat nga visual artist sa Cebu, tuyo ra unta niya nga makatukod og museum sa iyang usa ka ektarya ug tunga nga yuta sa Gaas aron adunay gallery alang sa iyang mga obra maestra ug sa iyang mga kaubang artist.
Apan sa niaging buwan, gi-upload sa iyang anak sa Facebook ang ilang lugar og didto nagsugod na og pangutana ang mga tawo ug hinayhinay nidagsa ang mga turista.
Matod ni Impas nga aksidente ang nahitabo sanglit wa si-
lay tumong nga pasikaton ang iyang luna ug nagplano nga magnegusyo apan di na niya mapugngan ang mga tawo.
Karon aduna na siyay upat ka payagpayag, mga landscape sa buwak ug unahan sa ganghaan mahimo kang maka-standby sanglit adunay lingkuranan diin imong makita ang mga hiyas nga iya sa kinaiyahan pinaagi sa P25 nga entrance fee.
Gipadayag niya nga wa sila kaandam sa pagpangabot sa tawo aron personal nga manguryuso gani ang tourist spot wa pay pangalan nga nakabutang apan ang mga tawo ra ang modumdom.
Gitug-an ni Impas nga gawas sa iyang museum, butangan usab niya og Cafe and Grill aron adunay makaon ug mainom ang mga bisita diin sa ngadtongadto, mopahigayon unya siya og libreng workshop alang sa mga bata sa Balamban aron masayod kon unsa ang art.
Gipadayag sa creator sa Florentino’s kon Little Tagaytay de Cebu kinsa mapinanggaon usab sa kalikupan nibutyag nga dako pa kini og gikinahanglan nga kantidad apan iyang gipaneguro nga makumpleto ra kini sa umaabot nga panahon.
Sagad sa mga adlaw nga modagsa ang mga tawo anaa sa Sabado ug Dominggo diin ang mga bikers nga mag-ride, call center agents, estudyante ug kadtong gustong mag-picnic mohapit sa lugar aron magpalabay sa oras. /