Wa gihapoy kausaban

Nireklamo ang usa ka negusyante nga tag-iya og gasoline station nga gitulis sayo ning buwana batok sa kapulisan sa dakbayan sa Talisay. Wa moirog ang imbestigasyon sa kapulisan sa hitabo bisan kon nakahatag na siya og close circuit television (CCTV) camera footage sa motorsiklo.

Siya pa intawon ang nag- follow-up sa Land Transportation Office (LTO) sa ngan sa tag-iya sa motorsiklo sumala sa registration.

Apan human niya ni mahatag ang ngan, wa kuno gihapoy nahitabo, wa moirog ang imbestigasyon. Nidangop na siya ngadto sa hepe.

Kining mao nga reklamo di talagsaon tungod kay common na kini kaniadto pa. Pila man ka mga kaso sa pagpatay, tulis ug uban pa nga nasulbad? Pila ra man kon naa.

Sa record sa kapulisan, maayo na lang tingali kon katunga sa mga kaso nasulbad. Basin sobra pa gani niini ang gidaghanon sa wa mangasulbad tungod kay human sa pasiunang imbestigasyon, wa nay gihimo ang kapulisan.

Sagad nahitabo ni sa mga kaso nga naandan ug maisip nga gagmay o ordinaryo lang. Sama aning tulis sa gasoline station.

Bisan sa paninguha sa kadagkuan sa kapulisan nga mausab ang imahe niini, lisod pang kombinseron ang publiko nga nagtinarong na sila sa trabaho. Sa ginaingon pa, natulog gihapon sa pansitan.

Hangtod karon, kinahanglan pa sa mga tagtungod nga maoy mokuha og mga ebidensya aron ihungit sa kapulisan sa ingon masulbad ang kaso, sama sa tag-iya sa gasolinahan.

Kon duna hinuoy padangog, kusog pa sa alas 4 nga molihok. Naa gani uban nga pulis nga di modukdok sa report kon way padangog.

Lisod pang makab-ot ang kausaban sa kapulisan kon ang daan nga mentalidad sa karaang mga pulis magpabilin. Mas paspas ang kausaban kon higpit ang pagsilot, inay tabunan sa kadagkuan.