Select the best
Nahuman ang semester vacation. Sa katapusan kong gabii sa pagpuyo sa Ginatilan, namisita si Gerald nako. Kahilakon siya dihang akong giprangkahan.
“Sori, Rald. Di ako ang girl nga para nimo. Buotan ka. Di ka lisod mahalon. But inigsuon ra gyud ang feeling ko nimo.”
“First time kong nagmahal og babaye, Letlet. Sakit kaayo nako, uy, ning akong kapakyasan.”
“Naay daghang babaye, Rald. Sure ko nga may girl nga para gyud nimo. I mean, babaye nga maoy imong destiny.” “Dawaton ko ang imong
desisyon, Let. Panghinauton ko nga magmalinawon ug magmalipayon ka sa imong lovelife.”
“Salamat sa imong panghinaot, Rald. Maybe, ning akong pagbalik sa siyudad, duna na koy mapili nilang duha.”
Sa pagbiya ni Gerald nako, kay gihatod ko man siya sa gawas sa gate sa balay nila ni Tiyo, bisag nagtalikod siya nako, namatikdan ko nga naghilak siya. Nagpamahid siya sa iyang mga tudlo sa iyang mga mata. Naluoy ko kang Gerald apan di ko katudloan ang akong kasingkasing.
Pagka buntag, ngitngit pa gani, misakay na kog Ceres paingon sa siyudad. Nine in
the morning didto na ko sa among balay. Naligo ko dihang nakapahuway na kog kadyot. Wa na sila si Papa ug Mama sa balay. Nangadto na sila sa tagsa-tagsa ka opisina nga ilang gitrabahoan. Pulos dagkog posisyon ug suweldo ang akong parents.
Duha ra ming magsuon ug nakahuman na ang akong maguwang sa college. Usa siya ka commercial plane
pilot. Dako siyag suweldo. Maghatagan siya nakog kuwarta every end of the month, gawas sa school allowance nga ihatag nako nila ni Mama ug Papa. Bisan pa man aning tanan, di ko
spoiled. Nagbinuotan ko sa akong studies ug naglikay sa pagpakigbarkada.
Miadto ko sa eskol. Gisusi ko ang akong mga classroom. Pagkahuman mipauli na ko. Wa pay tarong nga klase niadtong adlawa. Pagka gabii, nagkadungan na sab sila si Lemuel ug Loue sa pagpamisita nako. Nakahibawo sila nga mipauli na ko dinhi sa siyudad kay kagabii sa dayon ko nang pagkatulog, nanawag silang duha nako ug gisuginlan ko sila nga karon ko mopauli dinhi sa siyudad.
Gitan-aw ko silag tagsa-tagsa. Nasabtan ko sa ilang tinan-awan nako nga naghuwat sila sa akong desisyon.