IBF Bantam king Ancajas modepensa sa Ireland
Malisod nga tahas ang sagubangon ni Filipino world champion Jerwin Ancajas sa iyang lain na usab nga pagdepensa sa International Boxing Federation (IBF) super featherweight title karong Nobiyembre 18.
Gumikan kay kini maoy mosulong didto sa Belfast, Ireland aron modepensa batok sa undefeated local hero nga si Jamie Conlan.
Ang 30 anyos nga challenger maoy maguwang sa umaabot nga pro fighter ug kanhi world amateur champion nga si Michael Conlan.
Si Ancajas, lumad nga taga Panabo City, Davao del Norte, mismo maoy mikompirmar sa maong away pinaagi sa iyang Twitter account.
Si Conlan adunay 19 ka daog, 11 niini iyang gipang- knockout. Ang maong away maoy main undercard sa pagbalik og saka sa ring ni kanhi world featherweight champion Carl Frampton kinsa taga Ireland usab.
Kini maoy ikatulong pagdepensa ni Ancajas gawas sa nasod. Kon molampos, posibling mahinayon na unya ang gikahinaman nga all-Filipino world title fight diin iyang depensahan ang maong titulo batok ni Jonas Sultan sa Ala Boxing Gym.
Si Ancajas nagbitbit og record nga 27-1-1, 18 ka knockouts.