76-ANYOS MIANGKON NGA KILLER SA BABAYE

Way lipudlipud nga giangkon ni Leo Zafra nga siya maoy nipatay kang Mae Albasin ug milabay sa lawas niini niadtong Martes sa buntag.

Iya kining gihimo kay gibuwagan na siya sa babaye ug giinsulto pa ang iyang pagkalalake.

Niabot sa Sugbo kagahapon sa mga alas 4 sa kaadlawon si Zafra human siya kuhaa sa kapulisan sa dakbayan sa Talisay gikan sa kapulisan sa Sergio Osmeña Sr., Zamboanga del Norte nga maoy nakadakop kaniya.

Iyang gibutyag nga wa siya magmahay sa iyang pagpatay kang Albasin apan nangayo siyag pasaylo sa pamilya ug andam gihapon siyang magasto ug mopaeskuwela sa bata nga anak niini.

Matod niya nga sa wa pa nahitabo ang krimen, diha sila sulod sa sakyanan ug nahitabo ang ilang mainit nga panaglalis sa South Road Properties (SRP).

Si Zafra niingon nga iya kining gipatug-an sa tinuod kon aduna ba kini laing hinigugma, apan nihimakak si Albasin.

Apan taliwa sa ilang panagniangkon si Albasin nga aduna siyay laing hinigugma.

Bisan pa niini, matod ni Zafra, iyang gihangyo si Albasin nga di sila magbuwag ug iyang gidawat nga adunay laing uyab.

Padayon siyang mohatag sa tanang pangayuon ug mogasto basta di lang siya buwagan.

Taliwa sa ilang panaglalis adunay gisulti si Albasin nga- nong buwagan siya ug moadto na sa batan-on nga uyab.

Didto na natandog ang iyang pagka lalake samtang nagsige kini og hagit nga bisan pag patyon siya, di na kini makigbalik kaniya.

Iya kining napusilan sa paa apan bisan kon samdan, nisulti gihapon kini nga di na makigbalik kaniya.

Didto iya kining napusilan makaduha ka mga higayon.

Nagkanayon siya nga iyang gituyo nga gilabay duol sa iyang balay si Albasin aron dali ra nga makit-an sa pamilya.