13 KA PIER SA MANDAUE WA MAREHISTRO?
Di mominos sa 13 ka mga pribadong pantalan nga nag- operate sa dakbayan sa Mandaue ang wa pa narehistro sa Cebu Port Authority (CPA).
Matod ni Rene Bacon sa CPA nga tungod niini ila nang gipad-an ug mga suwat ning tuiga ang mga tagdumala sa maong mga pantalan nga kinahanglan moparehistro sa maong ahensya.
Apan sumala pa ni Bacon nga sagad mga tagdumala nagkanayon nga wa nila gamita alang sa negosyo ang mga pantalan.
Pipila sa mga pantalan nga gipasabot ni Bacon mao ang mga pantalan sa may F.E. Zuelig Avenue sa North Reclamation Area, Cabahug Private wharf, Golden Bridge Port sa Labogon, Sulpicio Repair Facility sa NRA, FF Cruz wharf, Gothong Shipping Wharf ug Opao Port.
Dugang ni Bacon nga padayon pa nilang gitino ang mga pangan sa uban mga pantalan.
Paambit ni Konsehal Elstone Dabon nga ang gipasabot nga mga pantalaan ni Bacon mao ang mga pantalan nga sagad nahimutang sa mga barangay duol sa dagat sama sa Looc, Labogon, Paknaan ug Umapad.
Nasuta ning mantalaan gikan ni Bacon nga duha lang ka mga pantalaan sa Brgy. Looc nga mao ang Ouano Wharf ug ang pantalan sa San Miguel ang niparehistro kanila.
Tungod niini, ang CPA mopahamptang og 100 porsyento nga port charges sa mga pribadong nagdumala sa pantalan sa Mandaue, ni Bacon.
Si Bacon giimbitar sa kagamhanan sa dakbayan isip panelist atol sa public hearing sa draft ordinance 97-2017 niadtong Huwebes sa hapon didto sa session hall.
Buot sa DO 97-2017 nga gipangamahan ni Dabon nga ma-regulate sa kagamhanan ang tanang pampubliko ug pribadong pantalan sa Mandaue aron masiguro ang kaluwasan sa mga pasahero ug mga sakyanang pangdagat.
Gawas niini, buot sab sa maong ordinansahon nga mopahamtang ug bayronon sa
operation sa mga pantalan ug pagkuha ug business permits sa dakbayan isip kabahin sa ilang operasyon.
“Ang action sa CPA aning wa magpa- register is we will collect 100 percent of port charges from them but if magparegister sila, only 50 percent of port charges will be collected by the CPA,” matod ni Bacon sa mga nanag-iya og pantalan.