P430 M sugyot pundo sa agrikultura sa Sugbo

Mas dako og P321 milyones ang gisugyot nga pundo sa Provincial Agriculturist Office alang sa sunod tuig kon itandi sa P109 milyones nga pundo karong tuiga.

Ang kantidad ipaubos sa pagdungog sa Sangguniang Panlalawigan sa Sugbo diin matag department head ipatawag aron depensaan ang ilang gipangayo nga pundo.

Si Provincial Agriculturist Roldan Saragena nipahibawo nga moabot sa P430 milyones ang pundo nga giduso sa ilang buhatan sa 2018. Sa maong pundo, P180 milyones ang igahin sa regular nga mga proyekto samtang, P250 milyones alang sa farm mechanization. Ubos sa farm mechanization, naglakip ang paghatag og corn mill, trading post, corn sheller, hand tractors ug pagpahimo og farm to

market roads, ug multi purpose drying pavement alang sa mga mag-uuma agi og suporta sa mga programa sa ilang buhatan.

Way labot sa P430 milyones ang P21 milyones nga agri-fishery insurance fund nga kuhaon ang pundo gikan sa Provincial Disaster Risk Reduction and Management Office (PDRRMO) isip kabahin sa pagpangandam sa mga kalamidad diin ang mga mag-uuma ug mananagat ang labing maapektuhan.

Sa 2017, mikabat og P109,593,466.28 ang pundo sa PAO, mas dako kini og 5.95 porsiyento kon itandi sa ilang pundo sa 2016 nga P103,435,000 2016.

Atol sa Kapistorya nga gipasiugdahan

sa Provincial Information Office, si Saragena namulong nga hingusgan nila ang pagpatuman sa Fishermen’s Scientist Training Program nga bag-o nilang programa gawas sa Farmer’s Scientist Training Program (FSTP) ug farm mechanization.

Magpatukod usab sila og ubay-ubay nga gagmay nga mga water impounding ug water catchment sa lalawigan kay nakita nila nga gikinahanglan kini sa mga mag-uuma panahon sa tinghuwaw o summer nga init kaayo.

“Atong gi- conserve kaning mga rainfall in times of rainy season, ato sila ma- collect during dry season or el niño ba kaha we still have water nga magamit nato sa agriculture,” dugang ni Saragena.