Kultura sa pagpatay

Taliwala ning hugot nga kampanya batok sa gidiling drugas sa nasod, dili usab nato masalikway ang padayon nga mga madugoon ug linuog nga panghitabo sa bisan asa nga suok sa nasod nga halos sa matag adlaw maoy mosugat sa atong kabuntagon. Patay diri, patay didto, lugos, tulis ug uban pa nga way giila kon si bisan kinsa ang mahingtungdan, maoy nakapabalisa karon ug naghatag og dakong hudlat sa seguridad sa atong palibot.

Base sa natala sa Philippine National Police, moabot na ngadto sa 6,225 ang nangamatay nga may kalabutan sa gidiling drugas.

Moabot ngadto sa 2,290 niini ang gipaubos pa sa imbestigasyon ug 3,850 ang napatay atol sa police operations. Apil usab niini ang nakalas nga 85 ka kinabuhi sa mga police ug military personnel atol sa operation.

Ang record wa hinuon magtino kon pila ka mga inosenteng sibilyan ang nabiktima.

Kining pagsulbong sa mga wa masulbad nga patay sa nasod nga naglakip usab sa mga minor-de-edad nagpamatuod lang nga dili na epektibo ang atong mga kapulisan.

Mipatugbabaw na ang ilang kaluya, kahuyang ug katapul sa paggukod ug pag-ila sa mga kriminal aron unta maturil sa hukmanan. Kini dakong sukwahi sa ilang gipanumpaan.

Tungod nini dili na karon magpanuko sa pagbuhat og krimen ang mga dautang elemento nga gani yano na kining mopatay aron matuman ang iyang tinguha.

Sa laktod nga pagkasulti, barato na ang kinabuhi sa tawo dinhi sa atoa, ug ang mga patay nga walay hustisya ug kasulbaran nga nakab-ot naghatag og timaan nga ang kultura sa pagpatay sa isig kaingon mituybo na sa atong yutang Pilipinhon.

Hangtod nga way hingpit nga kausaban sa atong sector sa kapulisan kini sa gihapon magpadayoh.

Asa na man diay ang kahapsay ug kalinaw sa atong nasod, Mr. PNP Chief Ronald "Bato" dela Rosa?