Mas maayong buhi ang suspetsado

Si Philippine National Police (PNP) Director General Ronald “Bato” dela Rosa namahayag nga gusto sa kapulisan nga 100 porsiyento nga buhi ang mga suspetsado nga ilang masikop.

Kini human mogawas ang resulta sa survey nga gihimo sa Social Weather Stations (SWS) nga nagpakita nga 90 porsyento sa mga Pilipino gusto nga masikop nga buhi ang mga suspetsado sa ilegal nga drugas.

Sa ginaingon pa, dead men tell no tales. Matod pa sa taga Cabadiangan, makasulti ba diay ang patay na.

Si Senior Supt. Joel Doria, hepe sa Cebu City Police Office (CCPO) nga napili nga usa sa mga Most Outstanding Filipinos sa 2017 sa Metrobank Foundation, nagtuo nga ang mga suspetsado o mga kriminal angay nga hatagan og second chance, sa kahigayonan nga magbag-o sa ilang kaugalingon.

Gawas pa niana, makakuha pa ang kapulisan og dugang impormasyon gikan sa suspetsado nga nasikop.

“As much as possible, we want to catch them alive because that will allow us to dig deeper and get more information about their operations,” matod pa niya.

Kon mapatay ang suspetsado, matod pa Doria, wa nay dugang kasayoran nga mahipos ang kapulisan gikan kaniya.

Mao kana ang gidangatan sa mokabat sa 3,850 ka mga suspetsado sa illegal nga drugas nga napatay sa kapulisan sa mga anti-drug operation.

Dead men tell no tales. Di na mapangutana kon kinsa ang tinubdan sa illegal nga drugas nga ilang gibaligya ug kon tinuod ba gyud silang namaligya og drugas.

Ang unang survey sa SWS nag-ingon nga 63 porsyento sa mga Pilipino nagtuo nga ang mga suspetsado sa illegal nga drugas patyon gihapon bisan kon motahan sila sa mga tinugyanan sa balaod.

Apan si PNP spokesman Chief Superintendent Dionardo Carlos niingon nga sa ilang 71,393 ka drug operations gikan sa Hulo 1, 2016 hangtod sa Septiyembre 30, 2017, mokabat sa 109,090 ka drug offenders ang ilang nasikop nga buhi.

Sila nag-atubang na og mga kasong kriminal sa hukmanan.