Dobling selebrasyon sa UV teams sa CBAA tourney

Dobling selebrasyon sa kadaugan ang naangkon sa University of the Visayas (UV) Green Lancers Alumni basketball teams niadtong Sabado sa gabii human tagsa-tagsa nilang gipangpukan ang ilang mga kaatbang sa nagpadayon nga Cebu Amateur Athletic Association CAAA Basketball Allumni (CBAA) tournament sa USC gym, dalan Sanciangko, dakbayan sa Sugbo.

Sa 45-below nga kategoriya, ang Green Lancers nga gipangulohan nila ni Junnel Maglasang, Aldrin Ocanada ug kanhi slam-dunk specialist nga si Randy dela Pisa ang mipatapsing sa Cebu Central Colleges Marines nga karon mao na ang University of Cebu Webmasters, 81-76, bisan pa man sa presensiya ni PBA star Dondon Hontiveros.

Ang undergoal stab ni Ocanada ug ang free throws ni Maglasang sa himatyong minutos may nagwanang sa kadaugan sa Lancers.

Ang pagkasipyat ni Hontiveros sa tres nga mao untay posibling makapa- overtime sa duwa maoy nagpapas sa paglaom sa UC kansang uwahing rally giduslitan sa fastbreaking play ni Leo Casinillo.

Sa sayo pa sa 46- above nga kategoriya, nakaipsot usab ang UV sa dakong pagpanghudlat sa University of Southern Philippines Foundation (USPF) Panthers, 93-86.

Si kanhi PBA mainstay Al Solis maoy mideriher sa opensa sa Lancers ug ang pagpangigo nila ni Celerino Cabanca Jr., Ramon “Montoy” Singson ug sa 71-anyos nga si Eutequio “Toko” Tan maoy ilang nahimong mahait nga hinagiban aron lupigon ang Panthers nga gibituonan usab ni kanhi Cebu City Mayor Mike Rama.

Kagabii, ang Cebu Institute of Technology (CIT) Wildcats nakigsangka sa CCC sa 46-above division samtang nagtakos usab ang SWU Cobras ug USJ-R Jaguars sa mao gihapong dapit.