7 nasikop sa pagronda sa drug den, buy-bust operation sa Ermita

Pito nasikop, lakip ang usa ka menor de edad, sa buybust operation ug pagronda sa usa ka drug den sa Sitio Bato, Barangay Ermita, siyudad sa Sugbo, pasado ala una gahapon sa hapon.

Si Chief Insp. Jacinto Mandal, hepe sa Carbon police station, niingon nga dugay na nilang gipanid-an ang maong drug den hangtod nga positibong dunay mga tawo nga namalit og ilegal nga drugas ug sa samang dapit usab gisuyop ang dugas hinungdan nga gihimo nila ang buy- bust operation.

Napusasan ang ilang target nga si Alfie Tatoy hingkod ang pangidaron nga nakuhaan og 17.8 gamos nga gituohang shabu nga gibana-bana nga mobalor og P210,040.

Atol sa pagsusi sa mga police ilang naabtan ang laing unom nga nagtiner ug ilegal nga drugas ug ang uban kanila naatlan nga nanuyop.

Giila sa kapulisan ang uban nga nangadakpan nga silang Ignacio Tatoy amahan sa ilang target nga si Alfie, 28, nakuhaan siya og usa ka kalibre .38 nga dunay tulo ka bala; Jason Tatoy, 20; Rolly Mahinay, 57; Roel Mahinay, 29; Nick Jugan, 28; ug ang 17 -anyos nga manghod sa target sa operasyon nga naa na karon sa kustodiya sa Women and Children Protection Desk sa Carbon Police station.

Nakuha usab sa sulod sa drug den ang daghang mga drug paraphernalia.

Gitug-an ni Major Mandal nga ang lawak nga giabangan ni Alfie Tatoy didto na usab manuyop ang mga kustomer niini.

“Dili ni siya tag-iya sa room kay taga Asturias man ni sila nag abang lang ni sila ug kwarto, diri lang nanginabuhi bagsakan sila ug drugs mao na,” matod ni Chief Insp. Jacinto Mandal.

Subayon pa sa Carbon police station kung kinsay nagsupply sa ilang ilegal nga drugas.

Nagtuo si Mandal nga dunay dakong personalidad nga maoy ilang kuhaan sa butang nga ipamaligya ra usab sa iyang mga igsuon ug amahan.

Giangkon ni Alfie nga iyaha ang ilegal nga drugas nga nakuha sa kapulisan apan iyang gipanalipdan ang iyang mga igsuon ug ang iyang amahan.

Matod niya nga didto na nagpuyo ang iyang pamilya ug wala kini kalambigitan sa iyang ilegal nga negosyo.

"Mga duha ka semana pa lang ko nagsugod ani kay wala man koy lain trabaho, pero kanang akong papa ug akung mga igsuon wala na silay labot,” matod ni Alfie Tatoy.

Ang Ermita usa sa nailang barangay sa dakbayan nga ubos sa impluwensiya sa negosyo sa gidiling drugas ug ubos kini sa hugot nga pagbantay sa awtoridad.