OIC sa CPDRC banga: Gigi Sanchez
Wa makauyon si kanhi Provinical Board member Grecilda "Gigi" Sanchez sa pamahayag ni Bobby Legaspi, labaw sa Civil Security Unit ug maoy gitudlong officer-in-charge sa CPDRC, nga ang iyang igsuon nga si Leodegreco Sanchez ang hinungdan nganong ipadayon ang pagsuspenso sa pagpanawat og mga dalaw sa Cebu Provincial Detention and Rehabilitation Center (CPDRC).
Si Gigi mismo ang misumbong niini ngadto kang Gob. Hilario Davide III ug nakigatubang usab ni Legaspi kagahapon.
Iyang giangkon nga nakadawat siya og text message gikan sa iyang igsuon nga anaa sa prisohan apan dili angay nga ihan-ok na lang ngadto kaniya ang tanang pasangil nga kini maoy hinungdan nga ipadayon ang pagsuspenso sa dalaw tungod sa paghupot niini og cellphone.
“While I confirmed Greco’s cellphone messages, but that should not merit. You’re blaming him for suspending the entire dalaw because he texted me,” tipik sa pamahayag ni Gigi.
"It is so disgusting that Bobby (Legaspi) did not even make mention of the punishment for those caught having drugs in their possession. In reality, drugs is the major livelihood
inside,” padayag ni Gigi. Iyang gihulagway si Legaspi nga incompetent o di kaantigo sa iyang trabaho ug nangita nalang ug kapahiran sa iyang kapakyas paglimpyo sa prisohan gikan sa negosyo sa ilegal nga drugas.
Una nang gibartolina si Greco ug laing inmate nga si Joavan Fernandez, duha ka semana ang nilabay tungod sa pagtinir og cellphone. Kini gikahibulong ni Gigi kon nganong nakatext gihapon ang iyang igsuon kaniya.
Human sa pagsumbong ni Gigi ngadto sa gobernador, gipahibalo ni Legaspi nga gimando ni Davide ang suspensiyon sa dalaw tungod sa nakuha niyang impormasyon gikan kang Gigi.