EBIDINSYA BATOK 2 KA TANOD ‘LIG-ON’

Homicide Section sa Cebu City Police Office nangandam na sa kasong murder nga ilang ipasaka batok sa duha ka mga barangay tanod nga maoy giingong nipusil patay sa ilang dinakpan gawas sa barangay hall sa Ermita niadtong Lunes sa gabii.

Ang mapasakaan og kaso sigon sa mga pamahayag sa duha ka mga saksi mao silang Gerome Miral ug Junnel Sanchez nunot sa kamatayon

sa ilang dinakpan niadtong Lunes sa hapon nga si Lendon Abadinas, taga Barangay Pardo, siyudad sa Sugbo.

Matod ni SPO2 Wetzel Berry, imbestigador sa Homicide Section, nga ilang gipaabot ang death certificate ni Abadinas gikan sa tambalanan nga gidalhan niini.

Gihulagway ni Berry nga lig-on ang ilang gihuptan nga ebedensya tungod sa pamahayag sa duha ka mga saksi nga mga binilanggo usab sa barangay niadtong mga tungora nga gipatay si Abadinas.

Nialigar sila si Sanchez nga nisukol ug nidagan ang ilang dinakpan sa dihang ila untang dad-on sa Carbon police station niadtong martes sa kaadlawon.

Gihulagway usab ni Berry nga namakak ang mga barangay tanod sanglit sa ilang blotter gidakop si Abadinas alas 6:30 sa gabii niadtong Lunes tungod sa kasong pagpangawat sa usa ka tindahan apan way nakasulat kinsa ang gibiktima niini.

“Sa log book nila is 6:30 pm gi arrest ang biktima sa kasong theft which is doubtful ta kay way complainant, murag mugna-mugna ba,” pasabot ni Berry.

Ang hepe sa kapulisan sa Central Visayas, Chief Supt. Jose Mario Espino, niawhag sa mga tanod nga kon duna silay madakpan nga mga nakahimo og salaod sa ilang barangay, ihatod dayon kini sa labing duol nga police station.

Matod sa heneral nga ang nahitabo sa dinakpan sa mga barangay tanod sa Ermita nakahatag kanila og leksyon nga dili angayan pasagdan na lang sa mga opisyal ang mga masikop sa ilang mga tawo.

Angay usab nga sundon ang procedure aron di sila mapasakaan og kaso ilabina kon ilang ibalhog pa sa selda sud sa barangay hall.

Wa mosupak si Espino sa mga selda sa sulod sa mga barangay hall sanglit daghan kini og kahimoan sama sa pag patuman sa ordinansa sa ilang lugar diin ang mga nakalapas mahimong kasamtangan nga ibalhog aron mahatagan ug proteksyon panahon sa kagabhion. /