Raket sa mga tanod sa Ermita

Gawas niadtong nadakpan ug napatay nga suspetsado sa pagpangawat sa mga barangay tanod sa Ermita, adunay ubang nga nadakapan apan wala dayon i- turn over sa kapulisan sa Carbon Police Station. Ang mga dinakpan, gi- detain pa og pipila ka adlaw diha sa detention cell sa Ermita barangay hall. Siguro sa tanang mga barangay hall dinhi sa Sugbo, kini rang Ermita ang naay detention cell.

Usa ka Lyndon Abadinas, naila nga kawatan sa Freedom Park, ang nadakpan sa mga tanod niadtong miaging Biyernes pa. Hangtod niadtong Lunes, diha pa ang dinakpan sa barangay hall naka- detain. Hangtod nga napatay o ba kaha gipatay sa tanod kay kuno midagan sa pagbalhin sa maong detainee ngadto sa Carbon police. Apan sa wala pa, gikulata siya matod pa. Ang mga suspetsadong tanod nga nakapatay ni Abadinas mao sila si Junnel Sanchez ug Jerome Miral.

Kon tinuod man gani kini, nganong nagtener man ug detention cell ang Ermita barangay hall? Wala silay katungod nga mo- detain sa ilang dinakpan.

Kon aduna man silay madakpan, gikinahanglan dayon nga sa labing madaling panahon, ilang i- turn over sa Carbon Police station aron didto kini i- detain ug dayon pasakaan og kaso.

Akong nakuha kining maong impormasyon gikan sa usa ka kasaligan nga tinubdan nga ang rason nganong i- detain una sa mga barangay tanod ang ilang dinakpan diha sa Ermita, kay anha diay nila i- negotiate. Kon makahatag sa ilang gidemanda nga kantidad, ilang buhian ang mga dinakpan. Apan kon dili makahatag, anha pa nila i- turn over sa kapulisan. Porbida, panguwarta gihapon.

Nagtuo kita mga mitabang ning mga tanod sa pagpahamtang sa kahapsay sa kalinaw sa maong barangay apan manapi man diay. Ayaw kog ingna nga walay kalibutan ani ang mga opisyal sa barangay labi pa si kapitan Felicisimo "Imok" Rupinta. Unsa man, gi- tolerate lang ni sa kapitan o apil siya sa bahin? Usbon nako, way katungod ang mga barangay tanod ug mga barangay officials nga modetiner ug mga suspetsado.