Tanod nagpinulis sab

Lisod tuohan kining katarungan ni Junnel Sanchez, ang barangay tanod sa Ermita, Cebu City kinsa mipusil patay sa usa ka giingong kawatan nga ilang nadakpan niadtong Martes sa tungang gabii. Matod sa 31 anyos nga Sanchez, kalit nga mieskapo ug midagan ang suspek nga si Lendon Abadinas bisan pa man og kini gipusasan hinungdan nga iyang gipusil ug napatay.

Lutaw ang iyang katarungan tungod kay kon tinuod man gani nga gipusasan, sa ato pa hinay kini nga modagan, ug di na mistil pa pusilon kay dali ra man kining maapsan kon gukoron.

Pero ambot og unsay nasulod sa iyang utok nga yano ra man niyang gipunting sa iyang pistola ug way pupanaga sa pagkadlit niini.

Tungod sa iyang gibuhat, mag-atubang siya og mga kaso. Gawas sa murder makuwestiyon usab ang paghupot niya og armas nga way lisensiya.

Kining gihimo ni Sanchez way kalahi-an sa pipila na ka mga insidente nga nahitabo nga may kalambigitan ang mga abusadong pulis.

Magbuhat og senaryo aron lang kunohay makakita og rason ug ma-justify ang yano nilang pagpatay sa mga suspetsado.

Nagtuo siguro si Sanchez nga isip tanod, aduna na usab siyay susama og gahum ug kapabilidad sa usa ka pulis.

Ning bag-ohay lang, dunay mga hugon-hugon nga tugotan nga makadala og armas ang mga tanod ilabi na sa higayon nga sila magpatrolya.

Dili man sab nato ikalimod nga aduna say risgo sa ilang kinabuhi ang ilang pagka tanod ug angayan lang sab nga aduna silay ikadepensa. Pero, unsa man say kasiguroan sa publiko nga kini dili gamiton sa pag-abuso?

Moabosar man gani nang ubang pulis nga sakto pa sa edukasyon ug training, unsa pa kaha kadtong wa �yud?