You’re my destiny
Sayo pa ang gabii niadtong tungora. Giatubang ko si Jake sa among sala. Malipayon siya. Aw, dasg man gyud siyang pagka tawo, parehas sila si Remon.
“Mao pa gyuy paglakaw ni Jonjon, Jake.” “Naunhan diay ko.” Mikatawa si Jake. Nakapanglingo na lang ko kay morag wa sa bokabolaryo ni Jake ang kaguol.
Unya nahikatawa ko kay nahiabot si Remon. Nag-abot ang duha ko ka suitors.
“Hello, everybody. Good evening.”
Nahikatawa mig kusog si Jake kay mi-bow pa si Remon sa among atubangan. Karon pa ko aning tawhana, joker sab diay. Gipalingkod ko si Remon sa tupad ni Jake kay sa taas nga sopa man naglingkod
si Jake. Gibalhin-balhin ko ang akong panan-aw sa duha. Sus, hapit ko makatukikig katawa kay nagpangidhat nako ang duha.
“Unya, Malou, unsa na man?”
Sus, nagkuptanay pa sa kamot ang duha. Nakapangawot ko sa akong ulo sa pangutana ni Jake.
“Bitaw, Malou, kinsa namong duha ni Jake ang naa sa imong kasingkasing?”
Na, gisundan pa gyud ni Remon ang pangutana ni Jake. Nakasabot ko nila. Gusto nilang modesisyon na ko.
“Seguradong nia ra man namo ni Jake ng imong sugton, Malou. Di ka magmahay kon kinsa namong duha ang imong sugton. True love man ning amo nimo ba. Di gyud ka namo pasakitan.”
Wow! Kanindot sa saad. Hilom kong nakaingon.
“Ingon man gyud mo aning mga laki, ba. Maayo kaayong manumpa atubangan sa babaye. Unya kon sugton na, mogawas na ang tinuod nga kolor. Magpabadlong na sa girlfriend.” Gingisloan nako ang duha.
“Di man mi ingon ana, Malou. Promise pa.”
“Bitaw, Malou. Ikaw ra ang girl nga gipitik sa among kasingkasing, uy!”
Dali kaayong nakatubag sila si Jake ug Remon. Nakapanglingo na lang ko kay sa akong paniid, agrisibo gyud sila nga ila kong mapasugot.
“Well, mituo na ko ninyo.
But seriously, di daling modesisyon. Klaruhon sa nako kon kinsa gyud kaninyong tulo ang akong love. Di baya kamo rang duha ang nangulitawo nako. Naa baya sab si Jonjon.”
Nagkatinan-away sila si Jake ug Remon paghisgot ko kang Jonjon. Sa tan-aw ko nilang duha, wa nila isipa si Jonjon nga ilang karibal sa gugma nila nako. Dako silag pagtuo nga naa ra gyud kanilang duha ang akong sugton.
(SUMPAYAN)